‘అన్నయ్య’ సినిమా తర్వాత చిరంజీవి, రవితేజ కలిసి నటిస్తున్న చిత్రం వాల్తేరు వీరయ్య. చిరుకు జోడీగా శృతిహాస‌న్ న‌టిస్తుంది. కేఎస్‌ రవింద్ర దర్శకత్వం. మైత్రీ మూవీ మేకర్స్ బ్యాన‌ర్‌పై న‌వీన్ యెర్నేని, వై.ర‌విశంక‌ర్ ఈ చిత్రాన్ని నిర్మించారు. ఈ సినిమాలో రవితేజ కీలకపాత్ర పోషిస్తుండటంతో అంచనాలు తారా స్థాయిలో ఉన్నాయి. ఇక ఇటీవలే రిలీజైన రవితేజ టీజర్‌కు ప్రేక్షకుల నుండి విశేష స్పందన వచ్చింది. తాజాగా రవితేజ, చిరంజీవి కలిసి స్టెప్పులేసిన పూనకాలు లోడింగ్‌ పాటను మేకర్స్ రిలీజ్‌ చేశారు. లేటెస్ట్‌గా రిలీజైన ఈ పాట యూట్యూబ్‌ను షేక్‌ చేస్తుంది. చిరంజీవి, రవితేజ కలిసి ఒకే ఫ్రేమ్‌లో స్టెప్పులేయడం అభిమానులకు నిజంగానే పూనకాలు తెప్పిస్తుంది. దేవీ శ్రీ ప్రసాద్‌ స్వర పరిచిన ఈ పాటను రోల్‌ రైడా, రామ్‌ మిర్యాలతో కలిసి దేవీ శ్రీ ప్రసాద్‌ ఆలపించాడు.
కాగా రిలీజ్‌ డేట్‌ దగ్గర పడుతుండటంతో చిత్రబృందం వరుస అప్‌డేట్‌లను ప్రకటిస్తున్నారు. ఇప్పటికే సినిమా నుండి రిలీజైన మూడు పాటలు చార్ట్‌ బస్టర్‌లుగా నిలిచాయి. యాక్షన్‌ ఫ్యామిలీ ఎంటర్‌టైనర్‌గా తెరకెక్కిన ఈ సినిమాలో రవితేజ పోలీస్‌ అధికారిగా కనిపించనున్నాడు. ఇక చిరు యూనియన్‌ లీడర్‌గా కనిపించనున్నట్లు సమాచారం. ఈ సినిమా సంక్రాంతి కానుకగా జనవరి 13న రిలీజ్‌ కానుంది.
