ఐకాన్‌స్టార్‌ అల్లు అర్జున్ కొత్త సినిమా అప్‌డేట్‌ వచ్చేసింది. ఆయన పుట్టినరోజు సందర్భంగా కొత్త సినిమా అప్‌డేట్‌ని తెలియజేస్తూ, లాస్‌ ఏంజెల్స్‌లోని ఓ స్టూడియోలో అల్లు అర్జున్, దర్శకుడు అట్లీ, హాలీవుడ్‌ టెక్నీషియన్స్‌పై చిత్రీకరించిన ఓ వీడియోను మేకర్స్‌ విడుదల చేశారు. పానిండియా డైరెక్టర్‌ అట్లీ దర్శకత్వంలో సన్‌ పిక్చర్స్‌ పతాకం పై కళానిధి మారన్‌ ఈ అంతర్జాతీయ చిత్రాన్ని నిర్మించనున్నారు. ఎ22 x ఎ6గా పిలవబడుతున్న ఈ చిత్రం భారతీయ విలువలతో కూడిన కథనంతో ఓ భారీ ఎమోషనల్‌ యాక్షన్‌ ఎంటర్‌టైనర్‌గా ఉంటుందని మేకర్స్‌ చెబుతున్నారు.
అంతర్జాతీయ స్థాయిలో ఆకర్షించేలా యాక్షన్‌, భావోద్వేగాలు ఉంటాయని, అత్యంత ప్రతిష్టాత్మకంగా గ్రాఫిక్స్‌, విజువల్‌ ఎఫెక్ట్స్‌, హాలీవుడ్‌ స్థాయి మేకింగ్‌తో సినిమా రూపొందనున్నదని మేకర్స్‌ వెల్లడించారు. ఈ ఏడాది చివర్లో చిత్రీకరణ మొదలుకానున్న ఈ పానిండియా సినిమాకు సంబంధించిన మిగతా విషయాలు త్వరలోనే వెల్లడికానున్నాయి.
