హారర్‌ కామెడీని ఇష్టపడే ప్రేక్షకులు ఆసక్తిగా చూస్తున్న చిత్రం భూల్‌ భులైయా 2. 2007లో అక్షయ్‌కుమార్‌, విద్యాబాలన్‌ ప్రధాన పాత్రల్లో వచ్చిన భూల్‌ భులైయాకు ఇది సీక్వెల్‌గా రాబోతోంది. కార్తీక్‌ ఆర్యన్‌, కియార అడ్వాణీ, టబు ప్రధాన పాత్రల్లో కనిపించనున్నారు. ఈ సందర్భంగా ట్రైలర్‌ను విడుదల చేశారు. చాలా రోజుల తర్వాత ఈ తలుపులు తెరుచుకోనున్నాయి అంటూ ఈ ప్రచార చిత్రం మొదలయింది. దెయ్యాన్ని పట్టుకుంటానంటూ హవేలీకి వచ్చిన కార్తీక్‌ ఆర్యన్‌ చేసే కామెడీ ఆకట్టుకోనుంది. రీత్‌, మంజులిక అనే రెండు పాత్రల్లో కనిపించే కియారా అడ్వాణీ ప్రేక్షకులకు భయం పుట్టిస్తుందని ట్రైలర్‌లోనే చూపించారు. కాసేపు భయపడుతూ నవ్వుకోడానికి ఈ హవేలీ అందరినీ ఆహ్వానిస్తోందని చిత్ర బృందం తెలిపింది. టీ సిరీస్‌ ప్రొడక్షన్స్‌, సినీ 1 స్టూడియోస్‌ పతాకంపై భూషన్‌ కుమార్‌, మురాద్‌ ఖేతని, అంజుమ్‌ ఖేతని, కృషన్‌ కుమార్‌ నిర్మిస్తున్నారు. అనీస్‌ బజ్మీ దర్శకత్వం వహించారు. మే 20న ఈ చిత్రం ప్రేక్షకుల ముందుకు రానుంది.
