రష్యా ను ఉద్దేశించి నాటో సెక్రటరీ జనరల్‌ మార్క్‌ రుట్టే తీవ్ర హెచ్చరికలు చేశారు. తమ కూటమిలోని పోలాండ్‌ లేదా మరేదైనా దేశం జోలికొస్తే వినాశకర పరిణామాలు ఎదుర్కోవాల్సి ఉంటుందన్నారు. పుతిన్ అయినా, మరెవరైనా సరే, తాము ఏదైనా సాధించగలమని అనుకుంటే పొరపాటే అవుతుందన్నారు. ఉక్రెయిన్‌ యుద్ధం ముగింపు విషయంలో అమెరికా`రష్యాల మధ్య సాగుతున్న చర్చల్లో మాస్కోదే పైచేయిగా నిలిచే అవకాశం ఉందనే వార్తల నడుమ రుట్టే వ్యాఖ్యలు ప్రాధాన్యం సంతరించుకున్నాయి. పోలాండ్‌, ఇతర సభ్యదేశాల భద్రతకు నాటో కట్టుబడి ఉంది. మాపై దాడి చేసి తప్పించుకోగలమని ఎవరైనా అనుకుంటే అది తప్పిదమే అవుతుంది. అటువంటి వారిపై పూర్తిస్థాయిలో విరుచుకుపడతాం. మా ప్రతిచర్యతో వినాశకర పరిణామాలు తప్పవు. పుతిన్‌తో పాటు మాపై దాడి చేయాలనే ఉద్దేశం ఉన్న ఇతరులకూ ఈ విషయాన్ని స్పష్టం చేస్తున్నా అని పోలాండ్‌ పర్యటనలో భాగంగా రుట్టే వ్యాఖ్యానించారు.
