అమెరికాలో ఇద్దరు భారత ట్రక్ డ్రైవర్లు భారీ కొకైన్ తో పట్టుబడ్డారు. ఆ కొకైన్ విలువ మన కరెన్సీలో దాదాపు రూ.62 కోట్ల వరకు ఉంటుందని అంచనా. ఇండియానా పరిధిలో హైవేపై పోలీసులు తనిఖీలు చేస్తుండగా, ఇద్దరు భారత డ్రైవర్లు ట్రక్కులో తరలిస్తున్న కొకైన్ ను పోలీసులు గుర్తించి, స్వాధీనం చేసుకున్నారు. అయితే, తమ ట్రక్కులో కొకైన్ ఉందనే విషయం తెలియదని నిందితులు చెబుతున్నారు.
పట్టుబడ్డ డ్రైవర్లను గుర్ ప్రీత్ సింగ్ (25), జస్వీర్ సింగ్ (30)గా గుర్తించారు. నిందితులు ఇద్దరూ కొంతకాలం క్రితం వేర్వేరుగా అమెరికాలోకి అక్రమంగా ప్రవేశించారు. ఇక్కడ డ్రైవర్లుగా పని చేస్తున్నారు. వీరు ట్రక్కులో రిచ్ మండ్ వెళ్తుండగా, ఇండియానా పోలీసులు హైవేపై తనిఖీ చేశారు. ఈ సందర్భంగా ఆ ట్రక్కులో డ్రగ్స్ ఉన్న విషయాన్ని శునకాలు పసిగట్టాయి. దీంతో అనుమానం వచ్చి పోలీసులు తనిఖీ చేయగా, డ్రైవర్ల స్లీపర్ బెర్త్ కింద పదుల సంఖ్యలో కార్డ్ బోర్డ్ బాక్సుల్ని గుర్తించారు. వాటిని తెరిచి చూడగా అందులో నిషేధిత కొకైన లభించింది. ఇది మొత్తం 309 పౌండ్లుగా ఉంది. దీని విలువ మన కరెన్సీలో దాదాపు రూ.62 కోట్లుపైగానే ఉంటుంది. ఈ కొకైన్ తో 1,13,000 మందిని చంపొచ్చని పోలీసులు అంటున్నారు.
