భారత సంతతికి చెందిన రిషి సునాక్‌ బ్రిటన్‌ కొత్త ప్రధానిగా ఎన్నిక కావడం పట్ల అమెరికా అధ్యక్షుడు జో బైడెన్‌ స్పందించారు. ఎంతో అద్భుతమని ఆయన అభివర్ణించారు. నా ఉద్దేశ్యంలో రిషి సునాక్‌ రాజును కలవడానికి వెళ్లినప్పుడు అది ఎంతో అద్భుతంగా ఉంటుంది. అది ఒక ఆదర్శనీయమైన మైలురాయిగా నిలచిపోతుంది. ఇది నిజంగా గొప్ప విషయమే అంటూ బైడెన్‌ తన స్పందన వ్యక్తం చేశారు. వలస భారతీయులు సాధిస్తున్న విజయాలను ఆయన అంగీకరించారు. దీపావళి సందర్భంగా వైట్‌ హౌస్‌లో అధ్యక్షుడు ఒక కార్యక్రమాన్ని ఏర్పాటు చేశారు. చీకట్లను పారదోలి, ప్రపంచానికి వెలుగును తేగల శక్తి ప్రజలకు ఉంటుందని బైడెన్‌ అన్నారు.
అమెరికా ఉపాధ్యక్షురాలు కమలా హ్యారిస్‌ కూడా భారత సంతతికి చెందిన వ్యక్తి కావడం గమనార్హం. కమలా హ్యారిస్‌ను ఎంచుకున్నది బైడెన్‌ అన్నది విదితమే. తన ప్రభుత్వంలో ఆసియా అమెరికన్లు గతంలో ఎన్నడూ లేనంత అధికంగా ఉన్న విషయాన్ని బైడెన్‌ ప్రస్తావిస్తూ ధన్యవాదాలు తెలియజేశారు.
