బ్రెజిల్‌ నూతన అధ్యక్షుడిగా లులా డ సిల్వా (76) పదవీ ప్రమాణం చేశారు. లులా మూడోసారి బ్రెజిల్‌ అధ్యక్ష పీఠాన్ని అధిరోహిస్తున్నారు. ప్రమాణ స్వీకారం అనంతరం లులా డ సిల్వా మాట్లాడుతూ బ్రెజిల్‌ను పునర్నిర్మిస్తానని హామీ ఇచ్చారు. గత కొన్నేండ్లుగా కోల్పోయిన హక్కులు, స్వేచ్ఛ, అభివృద్ధిని మళ్లీ దక్కేలా కృషి చేస్తానన్నారు. దేశంలోని పేదల జీవితాలను మెరుగుపరిచేందుకు జాతి, లింగ సమానత్వం కోసం కృషి చేస్తానని వాగ్దానం చేశారు. బోల్సోనారో పేరును ఎత్తకుండా ఆయన పాలనలో దేశంలో శాంతిభద్రతలు క్షీణించాయని, తప్పు ఎవరు చేసినా శిక్ష అనుభవించాల్సిందే అని హెచ్చరించారు.
ఇటీవల జరిగిన ఎన్నికల్లో జైర్‌ బోల్సోనారోపై లులా డ సిల్వా విజయం సాధించారు. తమ అభిమాన నాయకుడి ప్రమాణాన్ని వీక్షించేందుకు ఆయన మద్దతుదారులు పెద్ద సంఖ్యలో వేదిక వద్దకు తరలివచ్చారు. పెద్ద ఎత్తున తరలివచ్చిన ప్రజల నడుమ లులా అధ్యక్ష బాధ్యతలు చేపట్టారు. లులా డ సిల్వా 2003-2010 మధ్య రెండుసార్లు అధ్యక్షుడిగా ఉన్నారు.
