మహేష్‌బాబు కథానాయకుడిగా తెరకెక్కిన సర్కారు వారి పాట సందడి షురూ అయ్యింది. ఈ చిత్రంలోని కళావతి పాట వేగంగా 150 మిలియన్ల వ్యూస్‌ని సొంతం చేసుకుని సరికొత్త రికార్డ్‌ని సృష్టించినట్టు సినీ వర్గాలు తెలిపాయి. ఈ పాటకు అనంత్‌ శ్రీరామ్‌ సాహిత్యాన్ని అందించారు. సంగీత దర్శకుడు థమన్‌, గాయకుడు సిధ్‌ శ్రీరామ్‌ సక్సెస్‌పుల్‌ కాంబినేషన్‌ను ఈ పాట పునరావృతం చేసింది. కళావతిగా కీర్తి సురేష్‌ అందం, ఆమెతో మహేష్‌ చేసిన డ్యాన్స్‌ మూవ్‌మెంట్స్‌ ప్రేక్షకులు మళ్లీ మళ్లీ పాట చూసేలా చేశాయి. వచ్చే వారంలో ట్రైలర్‌ని విడుదల చేయనున్నట్టు సమాచారం. మే 12న ప్రేక్షకుల ముందుకొస్తున్న ఈ చిత్రానికి పరశురామ్‌ దర్శకత్వం వహిస్తున్నారు. మైత్రీ మూవీ మేకర్స్‌, జీఎంబీ ఎంటర్‌టైన్‌మెంట్‌, 14 రీల్స్‌ ప్లస్‌ సంస్థలు సంయుక్తంగా నిర్మిస్తున్నాయి.
