2004 ఎన్నికల్లో కాంగ్రెస్ పార్టీ విజయం సాధించింది. ఆ ఎన్నికల్లో ఘన విజయం తర్వాత ప్రధాన మంత్రి పీఠాన్ని చేపట్టాలని పార్టీ నేతల నుంచి తీవ్ర ఒత్తిడి వచ్చింది. కానీ సోనియా గాంధీ ఆ పదవిని సున్నితంగా తిరస్కరించారు. భారత రాజకీయ చరిత్రలోనే అది అత్యంత కీలక పరిణామం. తన కొత్త ఆత్మకథ ‘బిలాంగింగ్: ఎ జర్నీ ఆఫ్ లవ్’ ద్వారా నాటి తెరవెనుక రహస్యాలను ఆమె తొలిసారిగా బహిర్గతం చేశారు. ఎన్నికలకు ముందే తన పిల్లలు రాహుల్, ప్రియాంకలతో చర్చించినప్పుడు తాను ఎట్టి పరిస్థితుల్లోనూ ప్రధాని కాబోనని స్పష్టం చేసినట్లు ఆమె వెల్లడించారు. ఇందిరా గాంధీ, రాజీవ్ గాంధీల హత్యల తాలూకు విషాద జ్ఞాపకాలు తమ కుటుంబంలో ఇంకా పచ్చిగానే ఉండటంతో, ఆమె ప్రాణాలకు ముప్పు వాటిల్లుతుందనే భయంతో పిల్లలిద్దరూ ఈ పదవిని తీవ్రంగా వ్యతిరేకించారు.
ఫలితాల వెలువడిన అనంతరం 10 జనపథ్‌లో కూటమి నేతలంతా ఏకమై సోనియా గాంధీని ప్రధాని పదవిని స్వీకరించాలని ఒత్తిడి తెచ్చారు. నేతల బలవంతం తట్టుకోలేక ఆమె ఒక క్షణం అయోమయంతో “ఠీక్ హై” (సరే) అని తలవంచడంతో గదిలో సంబరాలు మొదలయ్యాయి. అయితే ఈ విషయం తెలుసుకున్న రాహుల్, ప్రియాంకలు వెంటనే తమ తల్లిని గట్టిగా నిలదీశారు. పిల్లల ఆవేదన, తన అంతరాత్మ మధ్య రాత్రి సోనియాకు నిద్రపట్టలేదు. చివరకు తన నిర్ణయానికే కట్టుబడాలని నిశ్చయించుకున్నారు.
మరుసటి రోజు ఉదయం పార్లమెంటరీ పార్టీ సమావేశంలో తన “అంతరాత్మ” బోధన మేరకు తాను ప్రధాని పదవిని చేపట్టడం లేదని స్పష్టం చేశారు. ఇది అందరినీ ఆశ్చర్యానికి గురిచేసింది. పార్టీ నేతల కన్నీళ్లు, ఆందోళనలను పక్కనపెట్టి, దేశ ఆర్థిక రథసారథిగా పేరుగాంచిన డాక్టర్ మన్మోహన్ సింగ్ పేరును ఆ పదవికి ప్రతిపాదించి రాజకీయ సంచలనం సృష్టించారు. ఈ విషయాన్ని సోనియా తన ఆత్మకథలో వివరించారు.
