ఎడిసన్, న్యూజెర్సీ: ఉత్తర అమెరికా తెలుగు సంఘం (TANA) న్యూజెర్సీ విభాగం ఆధ్వర్యంలో “స్థానిక సమాజానికి సేవ” కార్యక్రమం భాగంగా ఎడిసన్లో భారీ స్థాయిలో ఆహార పంపిణీ మరియు వేడి భోజనాల సేవ కార్యక్రమం ఘనంగా నిర్వహించారు. ఈ కార్యక్రమం ద్వారా మిడిల్సెక్స్ కౌంటీలో సుమారు 600 మంది లబ్ధిదారులకు సహాయం అందించారు. సమాజానికి అవసరమైన సమయంలో అండగా నిలవాలనే తానా సంకల్పాన్ని ఈ కార్యక్రమం మరోసారి ప్రతిబింబించింది.
ఈ సందర్భంగా వాలంటీర్లు సమిష్టిగా కృషి చేసి వందలాది వేడి భోజనాలను సిద్ధం చేసి, అవసరమైన కుటుంబాలకు అత్యవసర సరుకులతో కూడిన గ్రోసరీ బ్యాగులు అందజేశారు. డ్రైవ్-త్రూ విధానంలో క్రమబద్ధంగా పంపిణీ నిర్వహించడం ద్వారా ప్రతి ఒక్కరికీ సౌకర్యవంతంగా సేవలు అందించారు. వంట నుండి ప్యాకింగ్ వరకు, పంపిణీ నుండి నిర్వహణ వరకు ప్రతి దశలో వాలంటీర్లు అంకితభావంతో పనిచేయడం ప్రత్యేకంగా నిలిచింది.
ఈ సేవా కార్యక్రమానికి తానా అధ్యక్షులు డా. నరెన్ కోడలి మరియు ఎగ్జిక్యూటివ్ వైస్ ప్రెసిడెంట్ శ్రీనివాస్ లావు మద్దతుతో కార్యక్రమం విజయవంతమైంది. వారి మార్గదర్శకత్వం తానా సేవా కార్యక్రమాలకు ఎప్పటికప్పుడు ప్రేరణనిస్తోంది.
ఈ కార్యక్రమాన్ని విజయవంతం చేయడంలో తానా న్యూజెర్సీ బృందం కీలక పాత్ర పోషించింది. న్యూజెర్సీ రీజినల్ కోఆర్డినేటర్ సుధీర్ నరేపలుపు సమన్వయంతో కార్యక్రమం ప్రణాళికాబద్ధంగా నిర్వహించబడగా, తానా కోశాధికారి రాజా కసుకుర్తి ఆర్థిక మరియు నిర్వహణ అంశాల్లో ముఖ్యంగా తోడ్పడ్డారు. ఫౌండేషన్ ట్రెజరర్ శ్రీనివాస్ ఓరుగంటి, ఫౌండేషన్ ట్రస్టీ సతీష్ మేక తమ అనుభవంతో కార్యక్రమాన్ని బలోపేతం చేశారు. యూత్ కోఆర్డినేటర్ శ్రీనివాస్ చెరుకూరి యువతను సమీకరించి కార్యక్రమంలో చురుకైన భాగస్వామ్యాన్ని కల్పించగా, న్యూయార్క్ రీజినల్ కోఆర్డినేటర్ శ్రీనివాస్ భరతవారపు కూడా సహకారం అందించారు. అదనంగా రవి మాచెర్ల, సుందర్ బి. గోపినాథ్, దశరధ్, సుధీర్ రాంపురం, వంశీ నరేపలుపు వంటి వాలంటీర్లు తమ సమయం, శ్రమను అంకితం చేసి కార్యక్రమాన్ని విజయవంతం చేశారు. ముఖ్యంగా పలు హైస్కూల్ విద్యార్థులు మరియు రట్గర్స్ ఫార్మసీ విద్యార్థులు ఉత్సాహంగా పాల్గొని వంట, ప్యాకింగ్, పంపిణీ కార్యక్రమాల్లో చురుకుగా సేవలందించడం విశేషంగా నిలిచింది.
ఈ కార్యక్రమంలో యువత పాల్గొనడం ప్రత్యేక ఆకర్షణగా నిలిచింది. సమాజానికి సేవ చేయాలనే భావనను యువతలో పెంపొందించడం తానా ప్రధాన లక్ష్యమని నిర్వాహకులు తెలిపారు. ఈ కార్యక్రమాన్ని విజయవంతం చేయడంలో సహకరించిన ప్రతి వాలంటీర్, దాత, సహాయకులకు తానా హృదయపూర్వక కృతజ్ఞతలు తెలియజేసింది.
