రియాద్‌లో సౌదీ అరేబియా తెలుగు అసోసియేషన్ (సాటా) ఆధ్వర్యంలో సీజన్-5 తెలుగు భాషా దినోత్సవం, వార్షికోత్సవ వేడుకలు ఘనంగా నిర్వహించారు. ఈ కార్యక్రమానికి భారత రాయబారి విపుల్ ముఖ్యఅతిథిగా హాజరై వేడుకల్లో పాల్గొన్నారు. తెలుగు భాష, సంస్కృతి, సంప్రదాయాలను పరిరక్షించడంతో పాటు ప్రవాస తెలుగు సమాజానికి సామాజిక సేవలు అందించడమే లక్ష్యంగా సాటా గత ఐదేళ్లుగా పనిచేస్తోందని నిర్వాహకులు తెలిపారు.
ఇప్పటివరకు 300కు పైగా వ్యక్తులు, కుటుంబాలకు వివిధ సందర్భాల్లో సహాయం అందించినట్లు వెల్లడించారు. అత్యవసర వైద్యం, చిన్నారుల చికిత్స, ఆర్థిక ఇబ్బందుల్లో ఉన్న కుటుంబాలకు అండగా నిలవడంతో పాటు అవసరమైన సమయంలో సమాజం నుంచి సహాయాన్ని సమీకరిస్తున్నట్లు వివరించారు. సాటా కార్యకలాపాలకు కోర్ కమిటీ, కార్యవర్గ సభ్యులు, వాలంటీర్లు, దాతలు, స్పాన్సర్లు, తెలుగు సమాజ సభ్యుల సహకారం కీలకంగా ఉందని నిర్వాహకులు పేర్కొన్నారు. సాంస్కృతిక కార్యక్రమాల నిర్వహణకే పరిమితం కాకుండా, సౌదీ అరేబియాలో నివసిస్తున్న తెలుగు ప్రజలకు అవసరమైన సమయంలో తోడుగా నిలిచే సామాజిక వేదికగా సాటా ఎదిగిందని తెలిపారు.
సాటా వ్యవస్థాపకులు ఆనందరాజు గుండుబోగుల, రంజిత్ చిత్తులూరి, ముజమ్మిల్ షేక్ గత ఐదేళ్లుగా చేస్తున్న కృషిని భారత రాయబారి విపుల్ ప్రత్యేకంగా అభినందించారు. వారి దూరదృష్టి, అంకితభావం, సేవా స్ఫూర్తితో ప్రారంభమైన సంస్థ నేడు సాంస్కృతిక, సామాజిక సేవా కార్యక్రమాలకు వేదికగా ఎదగడం అభినందనీయమని పేర్కొన్నారు.
సామాజిక సేవలతో పాటు తెలుగు భాష, సాహిత్యం, సంగీతం, కళలు, పండుగలు, సంప్రదాయాలను భావితరాలకు పరిచయం చేసేందుకు సాటా నిరంతరం కార్యక్రమాలు నిర్వహిస్తోంది. సీజన్-5 వేడుకల్లో ప్రముఖ గాయకులు రఘు కుంచె, హారిక నారాయణ అందించిన సంగీత ప్రదర్శనలు ప్రత్యేక ఆకర్షణగా నిలిచాయి.
ఈ వేడుకల ద్వారా ఆంధ్రప్రదేశ్, తెలంగాణకు చెందిన తెలుగు కుటుంబాలు ఒకే వేదికపైకి వచ్చాయి. తెలుగు భాషా దినోత్సవంతో పాటు సౌదీ అరేబియా జాతీయ దినోత్సవ స్ఫూర్తిని కూడా కార్యక్రమంలో ప్రతిబింబించారు.
ఆతిథ్య దేశమైన సౌదీ అరేబియా పట్ల గౌరవం, భారతీయ సంస్కృతి పట్ల గర్వం, విభిన్న సంస్కృతుల మధ్య పరస్పర గౌరవం, స్నేహభావం వంటి సందేశాలను ఈ వేడుకలు చాటిచెప్పాయని నిర్వాహకులు తెలిపారు.
