అల్లరి నరేశ్, ఫరియా అబ్దుల్లా జంటగా నటిస్తున్న చిత్రం ఆ ఒక్కటీ అడక్కు. మల్లి అంకం దర్శకుడు. రాజీవ్ చిలక నిర్మాత. ఈ నేపథ్యంలో దర్శకుడు మల్లి విలేకరులతో ముచ్చటించారు. పెళ్లి చుట్టూ ఎలాంటి ఎమోషన్స్ ఉంటాయి? ఆ ఎమోషన్స్ని కొందరు ఎలా క్యాష్ చేసుకుంటున్నారు? ఈ ప్రశ్నలకు వినోదాత్మక సమాధానం మా ఆ ఒక్కటీ అడక్కు. అందరూ కనెక్టయ్యే కంటెంట్ ఇది అంటున్నారు. పెళ్లి గురించి అందరూ తేలిగ్గా అడిగేస్తారు. కానీ తీసుకునే వాళ్లు దాన్ని చాలా సీరియస్గా తీసుకుంటారు. కుటుంబానికి కూడా అదో బాధ. ఆ ఉద్వేగాన్నే కామెడీతో చెప్పాం. అలాగే పెళ్లి సంబంధాల విషయంలో ఎంత జాగ్రత్తగా ఉండాలో ఈ సినిమాలో చూపించాం. పెళ్లి గురించి అడిగినప్పుడు హీరో చెప్పే సమాధానమే ఆ ఒక్కటీ అడక్కు అని తెలిపారు.
నాలుగు సినిమాలతో బిజీగా ఉన్న నరేశ్, కామెడీ కథ అనేసరికి ముందు అంత ఉత్సాహం చూపించలేదని, అయితే కథ చెప్పడం మొదలుపెట్టాక, ఫస్టాఫ్ వినగానే మనం ఈ సినిమా చేస్తున్నాం అనేసి షేక్ హ్యాండి చ్చారని, తను ఓకే చేసిన ప్రాజెక్టులను వెనక్కు నెట్టి మరీ ముందు ఈ సినిమా చేశారని, అంతలా ఈ కథ నరేశ్ని ఆకట్టుకుందని మల్లి చెప్పారు. ఫరియా అందంతోపాటు కామెడీ టైమింగ్ ఉన్న నటి. ఇందులో కథను మలుపుతిప్పే పాత్ర ఆమెది. అబ్బూరి రవిగారు మాటలు ఆకట్టుకునేలా ఉంటాయి. గోపీసుందర్ పాటలు అద్భుతంగా ఉంటాయి. ఈ కథకు కావాల్సిన బడ్జెట్ని సమకూర్చి, సినిమా బాగా రావడానికి కారకులు మా నిర్మాత రాజీవ్ చిలకగారు. ఆయనకు జీవితాంతం రుణపడి ఉంటాను అన్నారు. మే 3న సినిమా విడుదల కానుంది.
