యువచంద్ర, శివకుమార్, కౌటిల్య, సుదర్శన్ రెడ్డి హీరోలుగా, ప్రియాంక శర్మ (సవారి ఫేమ్), నేహాదేశ్ పాండే, హమీద నటిస్తున్న చిత్రం యమ డ్రామ. ఫిల్మీ మెజీషియన్స్ పతాకంపై టి.హర్షచౌదరి దర్శకత్వంలో తోటకూర శివరామకృష్ణారావు నిర్మిస్తున్నారు. ఈ సినిమా విడుదలకు సన్నద్ధమవుతోంది. ఈ సినిమా టైటిల్ లోగోను హైదరాబాద్ లో జరిగిన కార్యక్రమంలో ప్రముఖ సినీ నటి విజయశాంతి ఆవిష్కరించారు. అనంతరం విజయశాంతి మాట్లాడుతూ, నేటి ట్రెండ్ ను దృష్టిలో పెట్టుకుని, యూత్ ఫుల్ థ్రిల్లర్ గా ఈ చిత్రాన్ని తెరకెక్కించినట్లుగా దర్శక, నిర్మాతలు చెప్పారు. ప్రేక్షకుల పల్స్ తెలుసుకుని మరీ వారు ఈ సినిమాను చేసినట్లు అర్ధమైంది. తప్పకుండా ఈ సినిమా అందరినీ అలరింపజేయాలని కోరుకుంటున్నట్లు ఆమె పేర్కొన్నారు.
చిత్ర దర్శకుడు టి.హర్షచౌదరి మాట్లాడుతూ మంచి ఎంటర్టైన్మెంట్, ఎమోషన్ తో పాటు మిగిలిన అన్ని అంశాలు ఇందులో ఉండటంతో పాటు యూత్ కు ఓ మంచి సందేశం కూడా ఇందులో ఉంది. ఫ్యామిలీస్, ఫ్రెండ్స్, లవర్స్ వంటి అన్ని వర్గాల వారు మెచ్చేలా దీనిని మలిచాం. సీనియర్ నటుడు సాయికుమార్ యముడి పాత్రలో నటించడం ఓ హైలైట్ అని చెప్పారు. నిర్మాత టి.శివరామకృష్ణారావు మాట్లాడుతూ అన్ని కార్యక్రమాలు పూర్తి చేసుకున్న ఈ సినిమాను ఏప్రిల్ లో విడుదల చేసేందుకు సన్నాహాలు చేస్తున్నామని వెల్లడించగా, ఈ సినిమాలో హీరోలలో ఒకరిగా నటించడం ఆనందంగా ఉందని కౌటిల్య తెలిపారు.
ఈ సినిమాలోని ఇతర ముఖ్య పాత్రలలో సాయికుమార్, పోసాని కృష్ణమురళి, శివన్నారాయణ, వేణు వండర్స్, జెన్ని, గౌతంరాజు తదితరులు నటిస్తున్నారు. ఈ చిత్రానికి తారాగణం. సినిమాటోగ్రఫీ: దాము నర్రావుల, సంగీతం: సునీల్ కశ్యప్, ఎడిటింగ్: ఉద్దవ్. సమర్పణ: సుకన్య, నిర్మాత: టి.శివరామకృష్ణారావు, దర్శకత్వం: టి.హర్షచౌదరి.
