ఫిరోజ్ ఖాన్, సనాఖాన్, సంహిత విన్య, ఐశ్వర్య, మిలింద్ గునాజీ ప్రధాన పాత్రల్లో నటిస్తున్న సినిమా యూ ఆర్ మై హీరో. ప్రతాని రామకృష్ణ గౌడ్ సమర్పణలో మౌంట్ ఎవరెస్ట్ పతాకంపై మిన్ని ఈ చిత్రాన్ని నిర్మిస్తున్నారు. రొమాంటిక్ హారర్ థ్రిల్లర్గా ఈ చిత్రాన్ని రూపొందించారు దర్శకుడు షేర్. ఈ సినిమా ఈ నెల 17న విడుదలకు సిద్ధమవుతున్నది. తాజాగా చిత్ర ప్రీ రిలీజ్ కార్యక్రమాన్ని హైదరాబాద్లో నిర్వహించారు. ఈ సందర్భంగా మంత్రి శ్రీనివాస్ గౌడ్ మాట్లాడుతూ తెలంగాణలో చిత్రీకరణకి అనువైన ప్రదేశాలు ఉన్నాయి. పర్యాటక శాఖ నుంచి పలు సౌకర్యాలు కల్పిస్తున్నాం. సమాజానికి అవసరమయ్యే మంచి సినిమాలు తీసే వారికి ప్రభుత్వం అండగా నిలుస్తుందన్నారు. నిర్మాత ప్రతాని రామకృష్ణ గౌడ్ మాట్లాడుతూ ఈ చిత్రంలో రొమాన్స్, సస్పెన్స్, హారర్ అంశాలుంటాయి. దర్శకుడు అందరికీ నచ్చేలా చిత్రాన్ని రూపొందించారు. చిన్న నిర్మాతలకు తెలంగాణ ప్రభుత్వం అండగా నిలబడుతున్నది అని అన్నారు. ఈ కార్యక్రమంలో గజ్జెల నగేష్, బాలమల్లు, మౌసమ్, అసిఫ్, రష్మీ ఠాగూర్, షబ్నం, లక్ష్మి, నిర్మాత సత్యనారాయణ తదితరులు పాల్గొన్నారు.
