భారత అంతరిక్ష పరిశోధన సంస్థ (ఇస్రో), అమెరికా అంతరిక్ష పరిశోధన సంస్థ (నాసా) సంయుక్తంగా రూపొందించిన శాటిలైట్‌ను త్వరలో లాంచ్ చేయనున్నారు. దీని కోసం ఆ ఉపగ్రహాన్ని అమెరికా యుద్ధ విమానంలో భారత్‌కు తరలించారు. నాసా-ఇస్రో సింథటిక్ ఎపర్చర్ (NISAR) ఉపగ్రహాన్ని సీ-17 విమానంలో కాలిఫోర్నియా నుంచి బెంగళూరుకు చేర్చారు. ప్రపంచ వ్యాప్తంగా భూమి క్రస్ట్, ఉపరితలం, మంచు ప్రాంతాల్లో మార్పులను పరిశీలించేందుకు అమెరికా, భారత్ కలిసి సంయుక్తంగా ఈ మిషన్ చేపట్టనున్నాయి. నిసార్ ఉపగ్రహం ద్వారా భూ పర్యావరణ వ్యవస్థలలో మార్పులను గమనిస్తారు. అలాగే భూకంపాలు, అగ్నిపర్వత పేలుళ్లు, సముద్ర మట్టం పెరుగుదల వంటి ప్రకృతి వైపరీత్యాల సంకేతాలను ఈ శాటిలైట్ గుర్తించడంతోపాటు హెచ్చరికలు జారీ చేస్తుంది. తద్వారా భూమి క్రస్ట్, ఉపరితలంలో జరుగుతున్న మార్పుల అధ్యయానికి ఇది సహకరిస్తుంది. మరోవైపు 2024లో ఆంధ్రప్రదేశ్‌లోని సతీష్ ధావన్ అంతరిక్ష కేంద్రం నుంచి ఈ శాటిలైట్‌ను ధ్రువ కక్ష్యలోకి పంపనున్నారు. అమెరికా, భారత్ మధ్య పౌర, అంతరిక్ష సహకారంలో మరో ప్రధాన అడుగు ఈ మిషన్ అని చెన్నైలోని అమెరికా రాయబార కార్యాలయం పేర్కొంది.
