అమెరికాలోని న్యూయార్క్ నగరం రణరంగంగా మారింది. తన అభిమానులకు బహుమతులు ఇస్తానన్న ప్రకటనతో వేలాది మంది తరలివచ్చారు. దీంతో ఉద్రిక్త పరిస్థితులు నెలకొన్నాయి. న్యూయార్క్ కు చెందిన 21 ఏళ్ల కై సెనాట్ అనే యూట్యూబర్ కు మంచి ఫాలోయింగ్ ఉంది. ఈ నేపథ్యంలో అతను తన ఇన్ స్టాగ్రామ్ పేజిలో ఓ పోస్ట్ పెట్టాడు. మన్ హటన్ యూనియన్ స్వ్కేర్ పార్క్ లో లైవ్ స్ట్రీమింగ్ ఈవెంట్ చేయనున్నట్లు అందులో పేర్కొన్నాడు. అంతేకాదు కార్యక్రమంలో అభిమానులను నేరుగా కలుస్తానని, వారికి ప్లే స్టేషన్ 5 గేమ్ కన్సోల్స్ సహా పలు బహుమతులు ఇస్తానని ప్రకటించారు. ఇది చూసిన అభిమానులు మన్ హటన్ పార్క్ కు వేలాదిగా తరలివచ్చారు. వీరిని అదుపు చేసేందుకు పోలీసులు రంగంలోకి దిగాల్సి వచ్చింది. ఈ క్రమంలో ఉద్రిక్త పరిస్థితులు చోటు చేసుకున్నాయి. కొందరు అభిమానులు అల్లర్లకు పాల్పడ్డారు. వీధుల్లో వాహనాలను అడ్డగించి, కార్ల అద్దాలను ధ్వంసం చేయడం వంటి చర్యలకు దిగారు. ఈ అల్లర్లలో పోలీసు అధికారులు సహా పలువురు గాయపడ్డారు. దీంతో కై సెనాట్ పై పోలీసులు కేసు నమోదు చేసి అతన్ని అదుపులోకి తీసుకున్నారు.
