ఉత్తర అమెరికా తెలుగు సంఘం(తానా) నూతన అధ్యక్షుడిగా నిరంజన్ శృంగవరపు ఎన్నికయ్యారు. కర్నూలు జిల్లాకు చెందిన నిరంజన్ అమెరికాలోని మిషిగాన్‌లో నివాసముంటున్నారు. తానా అధ్యక్ష ఎన్నికల్లో నరేన్ కొడాలి ప్యానెల్‌పై పోటీ చేసిన నిరంజన్ ప్యానెల్ ఘన విజయం సాధించింది. నిరంజన్ ప్యానెల్‌కు 10,866 ఓట్లు రాగా ప్రత్యర్థి నరేన్ ప్యానెల్‌కి 9,108 ఓట్లు మాత్రమే లభించాయి. ఓట్ల లెక్కింపు నుంచి నిరంజన్ ప్యానెల్ ఆధిక్యం ప్రదర్శించింది. నిరంజన్ ప్యానెల్‌కి తానా ప్రస్తుత అధ్యక్షుడు జయశేఖర్ తాళ్లూరి, అంజయ్య చౌదరి మద్దతు తెలిపారు. నరేన్ కొడాలి ప్యానెల్‌కి మాజీ అధ్యక్షులు కోమటి జయరాం, సతీష్ వేమన మద్దతుగా నిలిచారు. తానా ఉన్నతికి అందరూ కలసి పనిచేస్తారని ఆశిస్తున్నామని, అమెరికా, ఇండియాలో ప్రజోపయోగ కార్యక్రమాలు ఎన్నో చేయాలని జయశేఖర్ అభిలషించారు.
