అంకిత్ కొయ్య, నీలఖి జంటగా విజయ్ పాల్ రెడ్డి అడిదల, ఉమేష్ కుమార్ భన్సల్ సంయుక్తంగా నిర్మించిన చిత్రం ‘బ్యూటీ’. జీ స్టూడియోస్, మారుతీ టీం ప్రొడక్ట్స్, వానర సెల్యూలాయిడ్ సంయుక్తంగా తెరకెక్కించారు. జె.ఎస్.ఎస్. వర్ధన్ మాటలు, దర్శకత్వ బాధ్యతల్ని నిర్వహించారు. ఈ చిత్రం ఈనెల 19న విడుదల కాబోతోంది. ఈ నేపథ్యంలో కీలక పాత్రలు పోషించిన నరేష్, వాసుకి మీడియాతో ముచ్చటించారు. నరేష్ మాట్లాడుతూ ఈ కథకు బ్యూటీ అనేది సరైన టైటిల్. ఎందుకంటే ఈ కథలోనే బ్యూటీ ఉంది. జర్నలిస్ట్ సుబ్రహ్మణ్యం రాసిన కథని దర్శకుడు వర్ధన్ అందంగా మలిచాడు. ఎంటైర్టెన్మెంట్, ఎమోషన్స్ కలగలుపు ఈ సినిమా. సినిమాటిక్ లిబర్టీ అనేది ఏ మాత్రం లేకుండా పూర్తి ఆర్గానిక్గా తీసిన సినిమా ఇది అని అన్నారు.
నటి వాసుకి మాట్లాడుతూ ఆడపిల్ల తల్లిని కావడంవల్ల ఈ కథకు నేను బాగా కనెక్ట్ అయ్యాను. ఒక తల్లికీ, ఒక కూతురుకీ ఉండాల్సిన అవగాహన, బాధ్యత ఈ కథలో ఉన్నాయి. పిల్లల విషయంలో మనం కఠినంగా ఉంటే సరిపోదు, వారి పాయింట్లో ఏముందో చూడాలి అని చెప్పే సినిమా ఇది. ఈ తరం ప్రేక్షకులందరికీ నచ్చుతుంది అని పేర్కొన్నారు.
