ప్రియదర్శి, నిహారిక ఎన్ ఎం జంటగా నటించిన చిత్రం మిత్రమండలి. విజయేందర్ దర్శకత్వంలో బీవీ వర్క్స్ బ్యానర్పై బన్నీ వాస్ సమర్పణలో సప్తాస్వ మీడియా వర్క్స్ పై కళ్యాణ్ మంథిన, భాను ప్రతాప, డా. విజేందర్ రెడ్డి తీగల నిర్మించిన చిత్రమిది. ఈ మూవీ ఈనెల 16న రిలీజ్ కాబోతోంది. ఈ నేపథ్యంలో నిర్మాతలు కళ్యాణ్ మంథిన, భాను ప్రతాప మీడియాతో ముచ్చటించారు. ఆద్యంతం వినోదాన్ని అందిస్తూనే సెటైరికల్గా ఉండే కథ మిత్రమండలి. ఈ కథతో చాలా ఏళ్లుగా ట్రావెల్ చేస్తున్నారు బన్నీవాస్. ఆయన ద్వారానే ఈ కథ మా వద్దకు వచ్చింది. వినగానే నచ్చేసింది అని అన్నారు.
దర్శకులు అనుదీప్, మ్యాడ్ కల్యాణ్, ఆదిత్యహాసన్లతో కలిసి పనిచేసిన అనుభవం డైరెక్టర్ విజయేందర్కి ఉంది. తను మంచి దర్శకుడు. పూర్తి స్క్రిప్ట్తో మా వద్దకు వచ్చాడు. ఈ కథ రాసుకున్నప్పుడే కాస్టింగ్ విషయంలో తనకు ఓ ప్లానింగ్ ఉంది. అందుకే పాత్రలన్నీ పర్ఫెక్ట్గా సెట్టయ్యాయి. మొత్తంగా కథ ఎంత అద్భుతంగా రాసుకున్నాడో, అంతకంటే అద్భుతంగా తెరకెక్కించాడు విజయేందర్ అని తెలిపారు. బ్రహ్మానందం స్పెషల్ అట్రాక్షన్గా తీసిన జంబర్ గింబర్ లాలా సాంగ్ ఈ సినిమాకే హైలైట్ అని, ఆ పాట చిత్రీకరణ విషయంలో బ్రహ్మానందం బాగా సహకరించారని నిర్మాతలు చెప్పారు.
మిత్రమండలి ఓ బడ్డీస్ కామెడీ. జంగ్లీ పట్టణం అనే ఫిక్షనల్ టౌన్లో జరిగే కథ ఇది. ఇందులోని పాత్రలు, సన్నివేశాలు యూత్కి రిలేటెడ్గా ఉంటాయి. ప్రియదర్శి కామెడీ టైమింగ్తో అదరగొట్టేశాడు. ఇక నిహారక తన శైలి సెటైర్లతో అలరిస్తుంది. లేని ఓ కులం పేరుని ఈ సినిమాకోసం తీసుకొచ్చాం. సమాజంలో ఉన్న క్యాస్ట్ సిస్టం మీద సెటైరికల్గా ఈ సీన్లు ఉంటాయి. దీపావళికి సరైన సినిమా ఇది అని తెలిపారు.ఈ నెల 16న సినిమా విడుదల కానుంది.
