నవదీప్‌ హీరోగా రూపొందుతున్న చిత్రం లవ్‌ మౌళి. పంఖురి గిద్వానీ, భావన సాగి కథానాయికలు. అవనీంద్ర దర్శకుడు. నైరా క్రియేషన్స్‌, శ్రీకర స్టూడియోస్‌, సీ స్పేస్‌ సంస్థలు కలిసి ఈ చిత్రాన్ని నిర్మిస్తున్నాయి. ఈ చిత్రంలో మిర్చి హేమంత్‌, మిర్చి కిరణ్‌ ఇతర పాత్రలు పోషిస్తున్నారు. ఈ సినిమా టీజర్‌ను హైదరాబాద్‌లో విడుదల చేశారు. దర్శకుడు మాట్లాడుతూ నా జీవితంలో నేను చూసిన ప్రేమకథల ఫలితమే ఈ సినిమా. స్వీయ అనుభవాలతో ఈ కథ రాసుకున్నా అన్నారు. నవదీప్‌ మాట్లాడుతూ జీవితంలో మనం చాలా చేయాలనుకుంటాం. కానీ జరిగేది వేరు. అందుకు నా జీవితమే ఉదాహరణ. లాక్‌డౌన్‌ నేనేంటో నాకు చెప్పింది. ఆ టైమ్‌లోనే ఈ కథ విన్నాను. ఇదే నేను చేయాల్సిన సినిమా అనిపించింది. కచ్చితంగా నా కెరీర్‌లోనే బెస్ట్‌ సినిమా అవుతుంది అని అన్నారు.ప్రేమ గురించి నిజాయితీగా, బ్యూటిఫుల్‌గా చెప్పిన ప్రేమకథ ఇదని కథానాయిక పంఖురి గిద్వానీ పేర్కొన్నది. ఇంకా చిత్ర యూనిట్‌ సభ్యులందరూ మాట్లాడారు. ఈ చిత్రానికి రచన, దర్శకత్వం, కెమెరా, ఎడిటింగ్‌ : అవనీంద్ర, సంగీతం: గోవింద్‌ వసంత, పాటలు: అనంతశ్రీరామ్‌.
