అమెరికాలోని పిట్స్‌బర్గ్‌ యూనివర్సిటీకి చెందిన తెలుగు విద్యార్థిని సుదీక్ష కోణంకి (20) డొమెనికన్‌ రిపబ్లిక్‌ లోని ఓ రిసార్టులో బీచ్‌ వద్ద అదృశ్యమైన విషయం తెలిసిందే. ఆమె కోసం వారం రోజులుగా పోలీసులు తీవ్రంగా గాలిస్తున్నారు. అయినప్పటికీ ఆమె జాడ కానరాలేదు. ఈ క్రమంలో చివరిసారిగా సుదీక్ష కనిపించిన పుంటా కానా బీచ్‌ వద్ద ఆమెకు చెందినదిగా భావిస్తున్న దుస్తులను అధికారులు గుర్తించారు.
బీచ్‌ వద్ద ఉన్న లాంజ్ చైర్‌పై తెల్లటి నెటెడ్‌ సరోంగ్‌, లేత గోధుమ రంగు ఫ్లిప్‌-ఫ్లాప్‌ (పాదరక్షలు)ను అధికారులు గుర్తించారు. సుదీక్ష కోణంకి అదృశ్యమైన రాత్రి కనిపించిన సీసీటీవీ ఫుటేజ్‌లో ఆమె చివరిసారిగా ధరించిన దుస్తులను పోలీ ఉన్నట్లుగా ఇవి ఉన్నాయి. ఆ దుస్తులు చెక్కుచెదరకుండా ఉన్నాయి. ఎలాంటి ట్యాంపరింగ్ సంకేతాలు కనిపించడం లేదు. సముద్రంలోకి వెళ్లేముందు తన వస్తువులను లాంజ్ చైర్‌పై వదిలేసి ఉండొచ్చని అధికారులు భావిస్తున్నారు.
