హిందీ చిత్రసీమలో ఒకప్పుడు అగ్ర కథానాయికగా రాణించింది ప్రియాంక చోప్రా. నిక్‌ జోనస్‌తో వివాహానంతరం లాస్‌ఏంజిల్స్‌కు మకాం మార్చి హాలీవుడ్‌లో కూడా గుర్తింపును సంపాదించుకుంది. అభిమానులు ఈ భామను గ్లోబల్‌ స్టార్‌ అంటూ అభివర్ణిస్తారు. గత కొంతకాలంగా హాలీవుడ్‌ సినిమాలు, వెబ్‌సిరీస్‌లకే ప్రాధాన్యతనిస్తున్నది ప్రియాంక చోప్రా. భవిష్యత్తులో ఈ అమ్మడు హిందీ పరిశ్రమకు గుడ్‌బై చెప్పనుందని ముంబయి సినీ వర్గాల్లో వినిపిస్తున్నది. ఈ వార్తలకు బలం చేకూర్చేలా ముంబయిలోని తన ఆస్తులను వరుసగా అమ్మకానికి పెడుతున్నది ప్రియాంక. తాను ఎంతో ఇష్టపడి డిజైన్‌ చేసుకున్న ఆంధేరిలోని ఖరీదైన ప్లాట్‌ను కూడా ఇటీవలే పదికోట్లకు విక్రయించింది. అలాగే ఓ కమర్షియల్‌ ప్రాపర్టీని కూడా అమ్మేసిందట.
ఈ నేపథ్యంలో ప్రియాంక చోప్రా హిందీ చిత్రసీమకు దూరం కాబోతున్నదనే ప్రచారం జరుగుతున్నది. హాలీవుడ్‌లో వరుసగా భారీ ఆఫర్స్‌ రావడం, హిందీ ఇండస్ట్రీలో అంతగా అవకాశాలు లేకపోవడంతో లాస్‌ఏంజిల్స్‌ కేంద్రంగానే కెరీర్‌ను కొనసాగించాలనే నిర్ణయానికి వచ్చిందని చెబుతున్నారు.
