మూవీ ఆర్టిస్ట్‌ అసోసియేషన్‌ (మా) ఎన్నికల నోటిఫికేషన్ విడుదలైంది. ఈ మేరకు ఎన్నికల అధికారి వి.కృష్ణమోహన్‌ ఎన్నికల నోటిఫికేషన్ జారీ చేశారు. ఎన్నికల్లో ఎనిమిది మంది ఆఫీస్‌ బేరర్స్‌, 18 మంది ఎగ్జిక్యూటివ్‌ కమిటీ మెంబర్స్‌ కోసం జరిగే ఈ ఎన్నికలకు ఈ నెల 27 నుంచి 29 వరకు నామినేషన్లు స్వీకరించనున్నారు. ఈ నెల 30న నామినేషన్ల పరిశీలన జరుగుతుంది. నామినేషన్‌ ఉపసంహరణకు వచ్చే నెల 1 నుంచి 2వ తేదీ సాయంత్రం 5 గంటల వరకూ గడువు ఉంటుంది. అక్టోబర్‌ రెండో తేదీ సాయంత్రం బరిలో ఉన్న అభ్యర్థుల జాబితాను ప్రకటిస్తారు. ఒక అభ్యర్థి ఒక పోస్ట్‌ కోసమే పోటీ చేయాల్సి ఉంటుందని ఎన్నికల అధికారి తెలిపారు.
గత కమిటీలో ఎగ్జిక్యూటివ్‌ మెంబర్‌ అయి ఉండి, 50 శాతం కన్నా తక్కువ ఈసీ మీటింగ్‌లకు హాజరు కాకపోతే పోటీ చేసే అర్హత ఉండదు. 24 క్రాప్ట్స్‌లో ఆఫీస్‌ బేరర్స్‌గా ఉన్న వారు ఆ పదవులకు రాజీనామా చేయకపోతే మా ఎన్నికల్లో పోటీ చేయడానికి అర్హులు కారు అని తెలిపింది. అక్టోబర్‌ 10న ఉదయం 8 గంటల నుంచి మధ్యాహ్నం 2 గంటల వరకూ జూబ్లీహిల్స్‌ పబ్లిక్‌ స్కూల్‌లో పోలింగ్‌ జరగనుంది. అదే రోజు రాత్రి ఏడు గంటలకు ఫలితాలను వెల్లడిస్తామని ఎన్నికల అధికారి తెలిపారు.
