తీవ్రమైన నేరాలకు పాల్పడిన ఖైదీలందరినీ ఒక ఐలాండ్‌లోకి తీసుకెళ్తారు. వాళ్లను టీమ్‌లుగా విభజించి పోటీలు పెడతారు. చివరగా గెలిచినవారిని జైలు నుంచి విడుదల చేస్తారు. ఈ కాన్సెప్ట్‌తో ప్రపంచవ్యాప్తంగా అనేక సినిమాలు, సిరీస్‌లు వచ్చాయి. అమెరికా విదేశాంగ శాఖ ఇదే తరహాలో ఒక రియాలిటీ షో నిర్వహించేందుకు సిద్ధం అవుతున్నది. వలసదారులకు పోటీలు నిర్వహించి, గెలిచినవారికి అమెరికా పౌరసత్వం ఇచ్చేలా దీనికి రూపకల్పన చేశారు.
ఈ విషయాన్ని అమెరికాకు చెందిన హోంల్యాండ్‌ సెక్యూరిటీ (డీహెచ్‌ఎస్‌) ధృవీకరించింది. అయితే ఈ ప్రతిపాదనలకు ఇంకా పూర్తిస్థాయి ఆమోదముద్ర పడలేదని అధికారులు చెప్తున్నారు. ఇది హంగర్‌ గేమ్స్‌ తరహాలో ఒకరినొకరు దాడి చేసుకునేలా, హింసాత్మకంగా ఉండదని చెప్పారు. అదే సమయంలో ఓడిపోయిన వారిని వారి దేశాలకు తిప్పి పంపే ప్రతిపాదన కూడా లేదన్నారు.
