శివాజీ, నవదీప్, నందు, రవికృష్ణ, మానికా చిక్కాల, మౌనికా రెడ్డి, బిందుమాధవి, రాధ్య, అదితి భావరాజు ముఖ్య పాత్రలు పోషించిన సందేశాత్మక చిత్రం దండోరా. మురళీకాంత్ దర్శకుడు. రవీంద్ర బెనర్జీ ముప్పానేని నిర్మాత. ఈ నెల 25న సినిమా విడుదల కానున్నది. ఈ సందర్భంగా హైదరాబాద్లో నిర్వహించిన ప్రీరిలీజ్ ఈవెంట్లో అతిథిగా విచ్చేసిన విచ్చేసిన అగ్ర దర్శకుడు అనిల్ రావిపూడి మాట్లాడుతూ దండోరా టీమ్కు నేను ముందుగానే కంగ్రాట్స్ చెబుతున్నా. ఈ సినిమా హిట్ అవ్వడం పక్కా. ప్రచార చిత్రాలు చూస్తుంటే చిరస్థాయిగా నిలిచిపోయే చిత్రమవుతుందనిపిస్తున్నది. సమాజంలోని బలహీనతల్ని దమ్ముతో దండోరా వేయించి మరీ చెప్పేందుకు నిజంగా గట్స్ ఉండాలి. డైరెక్టర్ మురళీకాంత్కి ఆ దమ్ము, ధైర్యం ఉన్నాయి. నిర్మాత రవీంద్ర బెనర్జీ సినిమాలంటే నాకెంతో ఇష్టం. దండోరా తో ఆయన విజయాన్ని సాధించాలని కోరుకుంటున్నా అని అనిల్ రావిపూడి ఆశాభావం వ్యక్తం చేశారు.
కంటెంట్ని నమ్మి తీసిన సినిమా ఇదని, ఈ సినిమా తనకెంతో ప్రత్యేకమని నటి బిందుమాధవి చెప్పారు. ఇది చిన్న సినిమానే అయినా, థియేటర్లకు జనాన్ని రప్పించేంత గొప్ప కంటెంట్ ఇందులో ఉందని దర్శకుడు మురళీకాంత్ అన్నారు. ఈ ప్రయాణంలో సహకరించిన ప్రతి ఒక్కరికీ నిర్మాత రవీంద్ర బెనర్జీ థాంక్స్ చెప్పారు. ఇంకా నటులు శివాజీ, నవదీప్, రవికృష్ణ, మైత్రీ శశిధర్రెడ్డి, డీవోపీ వెంకట్ ఆర్.శాకమూరి తదితరులు మాట్లాడారు.
