దుల్కర్‌ సల్మాన్‌, మీనాక్షి చౌదరి జంటగా నటిస్తున్న చిత్రం లక్కీ భాస్కర్‌. మీనాక్షి చౌదరి కథానాయిక. వెంకీ అట్లూరి దర్శకుడు. సితార ఎంటర్‌టైన్‌మెంట్‌, ఫార్చ్యూన్‌ ఫోర్‌ సినిమాస్‌ పతాకాలపై సూర్యదేవర నాగవంశీ, సాయిసౌజన్య నిర్మిస్తున్నారు. ఈ సినిమాలో శ్రీమతి గారు అనే తొలి గీతాన్ని విడుదల చేశారు. జీవీ ప్రకాష్‌ కుమార్‌ స్వరపరచిన ఈ మెలోడీ గీతం వినసొంపుగా సాగింది. శ్రీమణి సాహిత్యాన్నందించిన ఈ గీతాన్ని విశాల్‌ మిశ్రా, శ్వేతా మోహన్‌ ఆలపించారు. కోపాలు చాలండి శ్రీమతిగారు కొంచెం కూల్‌ అవ్వండి మేడం గారు అంటూ కోపంతో అలిగిన భార్యను బుజ్జగిస్తూ భర్త పాడే ఈ పాట అందమైన భావాలతో సాగుతుందని చిత్ర బృందం పేర్కొంది.
1980-90 దశకంలో అసాధారణ విజయాలను సాధించిన ఓ బ్యాంక్‌ క్యాషియర్‌ నేపథ్య కథతో ఈ చిత్రాన్ని తెరకెక్కిస్తున్నారు. పాన్‌ ఇండియా స్థాయిలో భారీగా విడుదల చేయడానికి సన్నాహాలు చేస్తున్నారు. ఈ చిత్రానికి కెమెరా: నిమిష్‌ రవి, సంగీతం: జీవీ ప్రకాష్‌ కుమార్‌, రచన-దర్శకత్వం: వెంకీ అట్లూరి.
