న్యూయార్క్‌ సిటీ చరిత్రలో మొదటిసారి దీపావళి నాడు అక్కడి స్కూల్స్‌ అన్నీ సెలవు ప్రకటించాయి. హిందువుల ముఖ్య పండుగ దీపావళి పురస్కరించుకొని నవంబర్‌ 1న నగరంలోని స్కూళ్లన్నింటికీ సెలవు ఇచ్చినట్టు న్యూయార్క్‌ సిటీ డిప్యూటీ కమిషనర్‌ దిలీప్‌ చౌహాన్‌ వెల్లడించారు. ఈ ఏడాది జూన్‌లో మేయర్‌ కార్యాలయం దీపావళి రోజును పబ్లిక్‌ హాలిడేగా అధికారికంగా ప్రకటించింది. తాజాగా ఇది స్కూళ్లకు కూడా వర్తింపజేసింది. న్యూయార్క్‌ నగరంలో సుమారుగా 11 లక్షల మంది విద్యార్థులున్నారు. స్కూల్‌కు వెళ్లాలా? గుడికి వెళ్లాలా? అన్న టెన్షన్‌ వాళ్లకు ఈ ఏడాది లేదు. దీపావళి వేడుకను సంతోషంగా గడుపుకునేందుకు సెలవు ప్రకటించాం. ప్రవాస భారతీయులు, వారి సంఘాల నాయకులు, న్యాయవాదులు, ప్రజా ప్రతినిధులు ఎన్నో ఏండ్లుగా చేస్తున్న డిమాండ్‌ను సిటీ మేయర్‌ ఎరిక్‌ ఆడమ్స్‌ నెరవేర్చారు అని దిలీప్‌ చౌహాన్‌ చెప్పారు.
