వెన్నెల కిశోర్‌ టైటిల్‌ రోల్‌ పోషించిన చిత్రం శ్రీకాకుళం షెర్లాక్ హోమ్స్‌. అనన్య నాగళ్ల, సియా గౌతమ్‌ కీలక పాత్రధారులు. రైటర్‌ మోహన్‌ దర్శకుడు. వెన్నపూస రమణారెడ్డి నిర్మాత. వంశీ నందిపాటి చిత్రాన్ని విడుదల చేస్తున్నారు. హైదరాబాద్‌లో ఈ సినిమా ట్రైలర్ సక్సెస్ మీట్‌ని నిర్వహించారు. ట్రైలర్ మూడు మిలియన్‌ వ్యూస్‌ని క్రాస్‌ చేయడం బిగ్‌ ఎచీవ్‌మెంట్‌ అని, కథను నమ్మి చేసిన సస్పెన్స్‌ థ్రిల్లర్‌ ఇదని, కథనం అద్భుతంగా ఉంటుందని, సినిమా పూర్తవ్వగానే పార్ట్‌ 2 ఎప్పుడని అడుగుతారని వంశీ నందిపాటి చెప్పారు. ఉత్తరాంధ్ర నేపథ్యంతో కూడిన కథ కావడంతో వెన్నెల కిశోర్‌తోపాటు ఆర్టిస్టులంతా ఆ యాసను ప్రాక్టీస్‌ చేసి నటించారు. రాజీవ్‌గాంధీ హత్య జరిగిన రోజు జరిగే కథ ఇది.
ఆయన విశాఖ పర్యటన ముగించుకుని శ్రీపెరంబదూర్‌ వెళ్లారు. అక్కడ హత్యకు గురయ్యారు. అలాంటి పెద్ద సంఘటన జరిగినప్పుడు చిన్న సంఘటనల్ని ఎవరూ పట్టించుకోరు. ఆ రోజు జరిగిన కొన్ని కల్పిత ఘటనల చుట్టూ అల్లుకున్న కథ ఇది. సినిమా అన్‌ప్రిడిక్టబుల్‌గా ఉంటుంది అని దర్శకుడు రైటర్‌ మోహన్‌ పేర్కొన్నారు. ఇంకా అనన్య నాగళ్ల, నిర్మాత వెన్నపూస రమణారెడ్డితోపాటు చిత్ర యూనిట్‌ మొత్తం మాట్లాడారు. ఈ నెల 25న సినిమా విడుదల కానుంది.
