తమిళంలో సంచలన విజయం సాధించిన విడుదల చిత్రానికి సీక్వెల్‌గా రూపొందించిన విడుదల-2. విజయ్‌ సేతుపతి కథానాయకుడిగా వెట్రిమారన్‌ దర్శకత్వం. ఈ చిత్రాన్ని శ్రీవేదాక్షర మూవీస్‌ పతాకంపై నిర్మాత చింతపల్లి రామారావు తెలుగులో రిలీజ్‌ చేస్తున్నారు. ఈ సందర్భంగా ఏర్పాటు చేసిన విలేకరుల సమావేశంలో ఆయన మాట్లాడుతూ సామాన్యుల నుంచి ఉద్భవించిన ఓ అసామాన్యుడి వీర విప్లవ కథాంశమిది. తెలుగు రాష్ర్టాల్లో జరిగిన యథార్థ ఘటనల ఆధారంగా తెరకెక్కించారు. ఓరకంగా తమిళ దర్శకుడు తీసిన తెలుగు కథ అనుకోవచ్చు. మన నేటివిటీకి బాగా సరిపోయింది అన్నారు. ఈ సినిమాలో పెరుమాళ్‌ పాత్రలో విజయ్‌ సేతుపతి విశ్వరూపం చూస్తారని, నక్సలైట్‌ పాత్రలో ఆయన పండించిన ఎమోషన్స్‌ హైలైట్‌గా నిలుస్తాయని, ఇళయరాజా సంగీతం ఈ కథకు ప్రాణం పోసిందని చింతపల్లి రామారావు పేర్కొన్నారు. తమ సంస్థ ద్వారా విడుదల చేసిన మహారాజ అద్భుత విజయం సాధించిందని, ఆ కోవలోనే ఈ సినిమా సైతం బ్లాక్‌బస్టర్‌ హిట్‌గా నిలుస్తుందన్న నమ్మకం ఉందని, తొలిభాగానికి పదిరెట్లు భావోద్వేగాలతో ఈ సినిమా మెప్పిస్తుందని ఆయన తెలిపారు. ఈ నెల 20న ప్రేక్షకులముందుకొస్తోంది.
