ఉత్తర అమెరికా తెలుగు సంఘం(తానా), తానా ఫౌండేషన్‌ ఆధ్వర్యంలో తెలుగు రాష్ట్రాల్లో నిర్వహిస్తున్న చైతన్యస్రవంతి వేడుకల్లో భాగంగా కృష్ణా జిల్లా, వీరులపాడు మండలంలోని గోకరాజుపల్లిలో తానా అపలాచియన్‌ రీజియన్‌ సమన్వయకర్త నాగ పంచుమర్తి ఆధ్వర్యంలో నిర్వహించిన తానా కార్యక్రమాలు విజయవంతమయ్యాయి.
ఈ సందర్భంగా విద్యార్థులకు 6 లక్షల రూపాయల విలువ చేసే స్కాలర్‌షిప్‌లు, దివ్యాంగులకు ట్రైసైకిల్స్ , మహిళలకు కుట్టు మిషన్లు, విద్యార్థులకు బైసికిల్స్ పంపిణీ చేశారు. ఉచిత వైద్యశిబిరాలను ఏర్పాటు చేసి అవసరమైన వారికి పరిక్షలు మందులు ఇచ్చారు. ఈ కార్యక్రమానికి ముఖ్య అతిధులుగా కేశినేని చిన్ని, మాజీ ఎమ్మెల్యే తంగిరాల సౌమ్య వచ్చారు. తానా అధ్యక్షుడు అంజయ్య చౌదరి, తానాఫౌండేషన్‌ చైర్మన్‌ వెంకటరమణ యార్లగడ్డ, చైతన్యస్రవంతి కో ఆర్డినేటర్‌ సునీల్‌ పాంత్రాతోపాటు రాజా కసుకుర్తి, ఉమా కటికి, శ్రీనివాస్‌ కూకట్ల, శశాంక్‌ యార్లగడ్డ, ఠాగూర్ మల్లినేని, జోగేశ్వరరావు పెద్దిబోయిన తదితరులు ఈ కార్యక్రమంలో పాల్గొన్నారు.
ఈ సందర్భంగా అంజయ్య చౌదరి మాట్లాడుతూ, ప్రపంచంలోనే తానా అతి పెద్ద సంస్థ అని అంటూ అమెరికాలో తెలుగు భాష, సంస్కృతి పరిరక్షణకు తానా చేస్తున్న కృషిని వివరించారు. అమెరికాలోని చిన్నారులకు తెలుగు భాషను నేర్పించేందుకు తానా పాఠశాలను ఏర్పాటు చేశామని, తెలుగు కళల పరిరక్షణకు వీలుగా అమెరికాలో నిర్వహించే కార్యక్రమాల్లో ఇక్కడి కళాకారులకు అవకాశం ఇస్తున్నామని చెప్పారు. అలాగే తెలుగు రాష్ట్రాల్లో తానా చైతన్యస్రవంతి ద్వారా రైతులకు, ఇతరులకు సేవా కార్యక్రమాలను చేస్తున్నామని తెలిపారు.
