అమెరికాలో దశాబ్దాలుగా అమలవుతున్న జన్మహక్కు పౌరసత్వం నిబంధనలను మరింత కఠినతరం చేసే దిశగా దేశాధ్యక్షుడు డొనాల్డ్ ట్రంప్ మరోసారి కీలక చర్యలకు ఉపక్రమించారు. ఈ అంశానికి సంబంధించి ఇటీవల సుప్రీంకోర్టు నుంచి చుక్కెదురైనప్పటికీ, తన పట్టును సడలించకుండా ఆయన వెనుకంజ వేయలేదు. సుప్రీంకోర్టు తీర్పు వెలువడిన కొన్ని వారాల వ్యవధిలోనే, పౌరసత్వ నిబంధనలను పరిమితం చేసే ఉద్దేశంతో రెండు కొత్త ఎగ్జిక్యూటివ్ ఆర్డర్లపై ఆయన అధికారికంగా సంతకం చేశారు. గతంతో పోలిస్తే ఇవి కొంత పరిమిత పరిధిలో ఉన్నప్పటికీ, వీటిపై కూడా భవిష్యత్తులో తీవ్రమైన న్యాయపరమైన సవాళ్లు ఎదురయ్యే అవకాశం ఉందని నిపుణులు అంచనా వేస్తున్నారు.
తొలి ఎగ్జిక్యూటివ్ ఆర్డర్ ప్రకారం అమెరికాలో జన్మించే ప్రతి ఒక్కరికీ ఆటోమేటిక్గా పౌరసత్వం లభించే విధానానికి కొన్ని ప్రత్యేక మినహాయింపులను చేర్చారు. నవజాత శిశువు తల్లిదండ్రులు ఇద్దరూ యూఎస్ పౌరులు కానటువంటి సందర్భాల్లో, వారిలో కనీసం ఒకరిని ‘శత్రు దేశస్థుడు’గా లేదా విదేశీ ఉగ్రవాద సంస్థలతో సంబంధాలున్న సభ్యుడిగా గుర్తిస్తే వారి పిల్లలకు పౌరసత్వం హక్కు లభించదు. దీనితో పాటు దౌత్యపరమైన మినహాయింపులు పొందుతున్న విదేశీ ప్రభుత్వ ఉద్యోగులు, కేవలం అమెరికా పౌరసత్వాన్ని దుర్వినియోగం చేసుకోవడం కోసమే కుదుర్చుకునే వాణిజ్య ఒప్పందాలు (కొన్ని నిర్దిష్ట సరోగసీ కేసులు), అలాగే ఫెడరల్ చట్టాల ద్వారా పౌరసత్వ భద్రత లేని యూఎస్ టెరిటరీలలో జన్మించే వారికి కూడా ఈ కొత్త నిబంధనలు వర్తింపజేయనున్నారు.
