రవితేజ కథానాయకుడిగా నటించిన డివైన్ యాక్షన్ ఎంటర్టైనర్ ఇరుముడి. ప్రియా భవానీశంకర్ కథానాయిక. బేబీ నక్షత్ర కీలక పాత్రధారి. శివ నిర్వాణ దర్శకుడు. మైత్రీ మూవీమేకర్స్ పతాకంపై నవీన్ యెర్నేని, వై.రవిశంకర్ నిర్మించిన ఈ చిత్రం ఈ నెల 21న ప్రపంచవ్యాప్తంగా విడుదల కానున్నది.ఈ సందర్భంగా హైదరాబాద్లో నిర్వహించిన ప్రీరిలీజ్ ఈవెంట్లో రవితేజ మాట్లాడారు. ప్రతి టెక్నీషియన్ ప్రాణం పెట్టి చేసిన సినిమా ఇది. ఈ సినిమా మంచి ఎమోషనల్ రైడ్. ఇందులో కొన్ని పాత్రలు ప్రేక్షకుల మైండ్లో ఉండిపోతాయి. మైత్రీలో నా మూడో సినిమా ఇది. ఈ సంస్థ నుంచి నా సినిమాలు వస్తూనే ఉంటాయి. ఇందులో ఓ డిఫరెంట్ రవితేజను చూస్తారు. మీ అందరికీ తప్పకుండా ఈ సినిమా నచ్చుతుంది అని అన్నారు.
దర్శకుడు శివ నిర్వాణ మాట్లాడుతూ ఇందులో కథానాయకుడి పేరు త్రినాథ్. అతని ప్రపంచం ఓ ఎక్స్ట్రార్డినరీ ఎమోషనల్ ఫీల్ని ఆడియన్కి ఇస్తుంది. కూతురుకి స్వతంత్య్రం ఇచ్చే తండ్రి కథ ఇది. అందరి ఆడపిల్లల్లో తన కూతురునే చూస్తుంటాడు ఇందులో హీరో. దానికి ఓ కొత్త నేపథ్యాన్ని ఎంచుకున్నా. చాలా టెన్షన్ పెట్టే థ్రిల్లర్ ఇది. చివరి 20 నిముషాలైతే ఆడియన్ భావోద్వేగానికి లోనవుతాడు. ఇది ప్రాపర్ సీరియస్ మూవీ. రవితేజ నటన కోసం ఈ సినిమాను మళ్లీ మళ్లీ చూస్తారు అని పేర్కొన్నారు. ఇంకా కథానాయిక ప్రియా భవానీశంకర్, మ్యూజిక్ డైరెక్టర్ జీవీ ప్రకాశ్కుమార్, సాయికుమార్, అజయ్ఘోష్ తదితర చిత్రబృందంతో పాటు దర్శకులు కె.ఎస్.రవీంద్ర(బాబీ), సాయిరాజేశ్, బుచ్చిబాబు, రాహుల్ సంకృత్యాన్, నిర్మాత ఎస్కేఎన్ తదితరులు మాట్లాడారు.
