Skip to main content

Namaste NRI

ఏపీకి ముంచుకొస్తున్న మరో తుపాను!

ఇటీవలే ‘మురసు’ తుపాను మిగిల్చిన నష్టం నుంచి ఆంధ్రప్రదేశ్ ఇంకా పూర్తిగా కోలుకోకముందే, రాష్ట్రానికి మరో పెను తుపాను ముప్పు పొంచి ఉంది. దీనికి ‘అక్వాన్’ అని పేరు పెట్టారు. ఆగ్నేయ, నైరుతి బంగాళాఖాతంలో ఏర్పడిన వాయుగుండం వేగంగా బలపడుతోంది. ఇది తీవ్ర తుపానుగా మారి ఈ నెల 20న విశాఖపట్నం- బాపట్ల మధ్య తీరాన్ని దాటే అవకాశం ఉందని భారత వాతావరణ శాఖ హెచ్చరించింది.

ప్రస్తుతం విశాఖపట్నానికి సుమారు 960 కిలోమీటర్ల దూరంలో కేంద్రీకృతమై ఉన్న వాయుగుండం, వాయవ్య దిశగా కదులుతూ సోమవారం నాటికి తుపానుగా, మంగళవారం నాటికి తీవ్ర తుపానుగా రూపాంతరం చెందనుంది. ఆ తర్వాత నేరుగా ఏపీ తీరం వైపు దూసుకురానుంది. దీని ప్రభావంతో నవంబర్ 19, 20 తేదీల్లో కోస్తాంధ్ర, రాయలసీమ ప్రాంతాల్లో భారీ నుంచి అతి భారీ వర్షాలు కురవనున్నాయని ఐఎండీ వెల్లడించింది. ముఖ్యంగా తీర ప్రాంతాల్లో గంటకు 90 నుంచి 100 కిలోమీటర్ల వేగంతో బలమైన గాలులు వీస్తాయని, కొన్నిచోట్ల ఈ గాలుల తీవ్రత గంటకు 110 నుంచి 145 కిలోమీటర్ల వరకు కూడా చేరుకునే ప్రమాదం ఉందని హెచ్చరించింది.

ఈ తీవ్ర తుపాను ధాటికి శ్రీకాకుళం, విజయనగరం, పార్వతీపురం మన్యం, విశాఖపట్నం, అల్లూరి సీతారామరాజు, అనకాపల్లి, కాకినాడ, కోనసీమ, తూర్పు గోదావరి, పశ్చిమ గోదావరి, ఏలూరు, కృష్ణా, బాపట్ల జిల్లాల్లో భారీ నుంచి అతి భారీ వర్షాలు కురిసే అవకాశం ఉంది. నెల్లూరు, తిరుపతి, చిత్తూరు జిల్లాల్లోనూ భారీ వర్షాలు పడతాయని వాతావరణ శాఖ అంచనా వేస్తోంది. రానున్న గురు, శుక్రవారాల్లో ఉత్తరాంధ్ర తీర ప్రాంతాన్ని తీవ్ర తుపాను సమీపించనున్న నేపథ్యంలో ఆంధ్రప్రదేశ్ రాష్ట్ర విపత్తుల నిర్వహణ సంస్థ కూడా అప్రమత్తమైంది. మత్స్యకారులు ఎవరూ సముద్రంలోకి వేటకు వెళ్లవద్దని, తీరప్రాంత ప్రజలు ఎప్పటికప్పుడు హెచ్చరికలను గమనిస్తూ సురక్షితంగా ఉండాలని అధికారులు విజ్ఞప్తి చేస్తున్నారు.

Social Share Spread Message

Latest News

Our Advertisers

తాజా వార్తా చిత్రాలు

NRI Events