కలియుగ వైకుంఠం తిరుమల శ్రీ వెంకటేశ్వర స్వామి వారి సన్నిధిలో మరో చారిత్రక ఘట్టం ఆవిష్కృతం కానుంది. ఓ అజ్ఞాత భక్తుడు స్వామివారిపై తనకున్న అపార భక్తిని చాటుకుంటూ తిరుమల తిరుపతి దేవస్థానానికి కనీవినీ ఎరుగని రీతిలో భారీ విరాళాన్ని సమర్పించడానికి సిద్ధమయ్యారు. ఈ నెల 26వ తేదీన ఏకంగా 160 కేజీల బరువున్న అత్యంత విలువైన బంగారు ఆభరణాలను స్వామివారికి కానుకగా అందజేయనున్నారు.

ఈ భారీ విరాళంలో భాగంగా స్వామివారి అలంకరణకు ఉపయోగించే సుమారు 40 రకాల అద్భుతమైన బంగారు ఆభరణాలను రూపొందించారు. వీటి మార్కెట్ విలువ దాదాపు రూ. 250 కోట్ల వరకు ఉంటుందని అంచనా వేస్తున్నారు. ముఖ్యమంత్రి చంద్రబాబు సమక్షంలో ఈ ఆభరణాలను టీటీడీ అధికారులకు అధికారికంగా అందజేయనున్నారు.

గతంలోనే ఈ బృహత్తర విరాళం గురించి స్వయంగా ముఖ్యమంత్రి చంద్రబాబు ప్రకటించిన విషయం తెలిసిందే. ఇప్పుడు ఆ శుభఘడియ రావడంతో 26వ తేదీన జరగబోయే ఈ కార్యక్రమంపై సర్వత్రా ఆసక్తి నెలకొంది. స్వామివారి ఖజానాకు ఇంతటి భారీ స్థాయిలో స్వర్ణ కానుకలు అందనుండటంతో భక్తులు ఆనందం వ్యక్తం చేస్తున్నారు.















