నాగచైతన్య, సాయిపల్లవి జంటగా నటిస్తున్న చిత్రం తండేల్. శివుడి నేపథ్యంలో భక్తి ప్రధానంగా తెరకెక్కించిన నమో నమః శివాయ పాటను విడుదల చేశారు. ఫిబ్రవరి 7న ఈ సినిమా ప్రేక్షకుల ముందుకురానుంది. ఈ నేపథ్యంలో మ్యూజికల్ ప్రమోషన్స్లో వేగం పెంచారు. నమో నమః శివాయ పాటకు దేవిశ్రీప్రసాద్ స్వరాల్ని సమకూర్చగా, జొన్న విత్తుల సాహిత్యాన్ని అందించారు. అనురాగ్ కులకర్ణి, హరిప్రియ ఆలపించారు. శేఖర్ మాస్టర్ నృత్యరీతుల్ని అందించారు. కళాత్మక, ఆధ్యాత్మికత కలబోతగా మహా శివుడి నామస్మరణతో ఈ పాట భక్తి భావాలను మేల్కొలిపే విధంగా సాగింది. నాగచైతన్య, సాయిపల్లవి చక్కటి నృత్యాలతో మెస్మరైజ్ చేశారు. సర్వశక్తివంతుడైన శివుడి ఔన్నత్యాన్ని ఆవిష్కరిస్తూ ఈ పాటను తెరకెక్కించామని, సినిమాకు ప్రత్యేకాకర్షణగా నిలుస్తుందని మేకర్స్ తెలిపారు. మత్య్యకారుల జీవితం నేపథ్యంలో ప్రేమ, దేశభక్తి ప్రధానాంశాలుగా ఈ సినిమాను తెరకెక్కించారు. ఈ చిత్రానికి సంగీతం: దేవిశ్రీప్రసాద్, నిర్మాణ సంస్థ: గీతా ఆర్ట్స్, సమర్పణ: అల్లు అరవింద్, నిర్మాత: బన్నీ వాసు, రచన-దర్శకత్వం: చందూ మొండేటి.
