అమెరికన్ పౌరసత్వం కోసం దరఖాస్తు చేసుకున్న విదేశీ వలసదారుల కోసం ఈ ఏడాదిలో కొత్త తరహాలో నేచురలైజేషన్ సివిక్స్ టెస్ట్ని నిర్వహించనున్నట్లు అమెరికా సిటిజెన్షిప్ అండ్ ఇమిగ్రేషన్ సర్వీసెస్ (యూఎస్సీఐఎస్) ప్రకటించింది. ఇందుకు సంబంధించి ఫెడరల్ రిజిస్టర్లో నోటీసు విడుదల చేసినట్లు పేర్కొంది. అమెరికన్ పౌరసత్వం పొందాలంటే విదేశీ పౌరులు తప్పనిసరిగా ఈ పరీక్షలో ఉత్తీర్ణులు కావలసి ఉంటుంది. అమెరికా చరిత్ర, ప్రభుత్వంపై దరఖాస్తుదారునికి ఉన్న అవగాహనను ఈ పరీక్ష ద్వారా అంచనా వేయడం అమెరికన్ చట్టాల ప్రకారం తప్పనిసరి. అమెరికన్ సమాజం పట్ల, పౌరుల హక్కులు, బాధ్యతలను పరిరక్షించడం, కాపాడడం పట్ల విదేశీ పౌరులకుగల అవగాహనను అంచనా వేయడం ఈ పరీక్ష లక్ష్యమని తెలిపింది. అమెరికన్ పౌరసత్వం ప్రపంచంలోనే అత్యంత పవిత్రమైనదని, అమెరికన్ విలువలు, సిద్ధాంతాలను పూర్తిగా అర్థం చేసుకుని పాటించే విదేశీ పౌరులకే తమ దేశ పౌరసత్వం లభిస్తుందని యూఎస్సీఐఎస్ ప్రతినిధి మాథ్యూ ట్రాజెసర్ స్పష్టం చేశారు.
