సత్యదేవ్ కథానాయకుడిగా రూపొందుతున్న చిత్రం రావు బహదూర్. వెంకటేశ్ మహా దర్శకుడు. చింతా గోపాలకృష్ణ రెడ్డి, అనురాగ్రెడ్డి, శరత్చంద్ర నిర్మాతలు. సూపర్స్టార్ మహేశ్బాబు, నమ్రత శిరోద్కర్ జీఎంబీ ఎంటర్టైన్మెంట్ సమర్పణలో రూపొందుతున్న ఈ చిత్రం ప్రస్తుతం నిర్మాణ దశలో ఉన్నది. ఈ నేపథ్యంలో మేకర్స్ మ్యూజిక్ ప్రమోషన్స్ మొదలుపెట్టారు. ఇందులో భాగంగా ఈ సినిమాలోని ఫస్ట్ సింగిల్ ఓ సుందరి ని రిలీజ్ చేశారు. స్మరణ్ సాయి మృదువైన స్వరాలతో, ఆహ్లాదకరమైన నేపథ్యంతో ఈ గీతాన్ని అద్భుతంగా స్వరపరిచారు. ఈ కంపోజిషన్ నెమ్మదిగా చిత్రంలోని వింటేజ్ భావాన్ని ప్రతిబింబించే వాతావరణాన్ని సృష్టిస్తుంది. రచయిత రెహ్మాన్ భావోద్వేగంతో నిండిన పదాలతో ప్రేమలోని ఆరాధనను, మనసులోని సున్నితమైన భావాలను అందంగా వ్యక్తీకరించారు. విజయ్ యేసుదాస్ తన హృద్యమైన వోకల్స్ తో ఈ పాటను మరింత ఉన్నత స్థాయికి తీసుకెళ్లారు. ఆయన స్వరం మెలోడీలో సునాయాసంగా ప్రయాణిస్తూ మధుర అనుభూతిని కలిగిస్తుంది. దర్శకుడు వెంకటేశ్ మహా అభిరుచి ఈ పాటలోని విజువల్స్ , భావోద్వేగాల్లో స్పష్టంగా కనిపిస్తుంది. సత్యదేవ్, దీపా థామస్ల ఆకట్టుకునే ఆన్స్క్రీన్ ప్రెజెన్స్తో ఈ పాటకు ప్రత్యేకమైన వింటేజ్ అందం వచ్చింది.
దర్శకుడు వెంకటేశ్ మహా మాట్లాడుతూ నిర్మాతల సహకారం వల్లే ఈ సినిమాను సులభంగా పూర్తి చేయగలిగాను. నటీనటులంతా అద్భుతంగా నటించారు. ఈ సినిమాకు పనిచేసిన టెక్నికల్ టీమ్కి పేరుపేరున ధన్యవాదాలు. కేరాఫ్ కంచర్లపాలెం సినిమాకు మించిన అనుభూతిని మీకివ్వాలని ఈ సినిమా తీశాను అన్నారు. నిర్మాతలు ఇంత ఆనందంగా ఉన్నారంటే, దర్శకుడు మహా ఎంత అద్భుతంగా సినిమా తీశాడో అర్థం చేసుకోవచ్చని, బాహుబలి, అవతార్ సినిమాల స్థాయిలో మమ్మల్ని అలరించే సినిమా రావు బహదూర్ అని హీరో సత్యదేవ్ నమ్మకంగా చెప్పారు.
