శర్వానంద్ భోగి చిత్రం నుంచి ఇటీవల విడుదలైన ఎగిలివారంగా లేసి..ఇల్లలికి పూదిచ్చి అనే పాటకు సంగీత ప్రియుల నుంచి అద్భుతమైన స్పందన లభించింది. అచ్చ తెలంగాణ మాండలికంలో చంద్రబోస్‌ రాసిన ఈ పాటలో గ్రామీణ జీవితాన్ని, కులవృత్తుల నేపథ్యాన్ని కళ్లకుకట్టారు. దసరా పర్వదినం సందర్భంగా ఈ సినిమా నుంచి రెండో గీతాన్ని విడుదల చేశారు. అన్నయ్య పానం అంటూ సాగే ఈ పాటలో అన్నాచెల్లెళ్ల అనుబంధాన్ని, ఆప్యాయతలను హృద్యంగా ఆవిష్కరించారు.
అన్నయ్య పానంలో పూసిన పువ్వులు ఐదుగురు చెల్లెళ్లంట. ఆ చిట్టి చెల్లెళ్ల పంచప్రాణాలు అన్నయ్య ఒకడేనంట అంటూ అన్నయ్య తాలూకు నిస్వార్థమైన ప్రేమకు అద్దం పట్టిందీ పాట. చంద్రబోస్‌ రచించిన ఈ పాటను భీమ్స్‌ సిసిరోలియో స్వరపరిచారు. 1960 దశకం ఉత్తర తెలంగాణ-మహారాష్ట్ర సరిహద్దు నేపథ్య కథాంశంతో భోగి చిత్రాన్ని తెరకెక్కిస్తున్నారు. సంపత్‌నంది దర్శకత్వం వహిస్తున్న ఈ చిత్రానికి కేకే రాధామోహన్‌ నిర్మాత. త్వరలో రిలీజ్ డేట్‌ను ప్రకటించనున్నారు. అనుపమ పరమేశ్వరన్‌, డింపుల్‌ హయాతి తదితరులు చిత్ర ప్రధాన తారాగణం.
