జర్మనీలోని ఫ్రాంక్ఫార్ట్ నగరంలో తిరుమల వైభవాన్ని ప్రతిబింబిస్తూ, శ్రీ వెంకటేశ్వర స్వామి కళ్యాణ మహోత్సవం అత్యంత భక్తిశ్రద్ధల మధ్య ఘనంగా నిర్వహించారు. తిరుమల తిరుపతి దేవస్థానం (టిటిడి), ఆంధ్రప్రదేశ్ నాన్ రెసిడెంట్ తెలుగు సొసైటీ (ఏపీఎన్ ఆర్ టిఎస్) సహకారంతో ఈ వేడుకను జరిపారు.
శ్రీ బాలాజీ వేదిక్ సెంటర్ జర్మని (ఎస్ బి విసి)ఆధ్వర్యంలో ఈ దివ్య మహోత్సవం జరిగింది. టిటిడి డెప్యూటి ఇ.ఇ. మల్లయ్య పర్యవేక్షణలో టిటిడి వేద పండితుల బృందం వేద ఆచారాలతో, శాస్త్రోక్తంగా శ్రీవారి కళ్యాణ కృతువును నిర్వహించింది. వేద మంత్రోచ్ఛారణలు, సాంప్రదాయ సంగీతం, మంగళ వాయిద్యాలు, పుష్ప అలంకరణలతో వేదిక మొత్తం ఆధ్యాత్మిక వాతావరణంతో నిండిపోయింది.
ఈ కార్యక్రమానికి కాన్సులెట్ జెనరల్ ఆఫ్ ఇండియా కాన్సులెట్ జెనరల్ శుచితా కిషొర్, మేయర్ హెల్మ్, ఇంకా ప్రతినిధులు వారి కుటుంబ సభ్యులతో కలిసి హాజరై, శ్రీవారి దివ్య ఆశీస్సులను పొందారు. విదేశీ నేలపై భారతీయ సంస్కృతికి లభించిన ఈ గౌరవం అందరినీ ఆనందభరితులను చేసింది.
శ్రీదేవి, భూదేవి సమేత శ్రీ వెంకటేశ్వర స్వామి వారి దివ్య కళ్యాణ ఘట్టాన్ని ప్రత్యక్షంగా వీక్షించిన భక్తులు పులకించిపోయారు. అర్చకులు తిరుమలలో జరిగే విధంగా కళ్యాణ కార్యక్రమాన్ని కన్నుల పండుగగా తీర్చిదిద్దారు. వేదిక మొత్తం గోవిందా గోవిందా నినాదాలతో మారుమోగింది. కళ్యాణ మహోత్సవంతో పాటు వేద పారాయణం, సాంప్రదాయ అలంకరణలతో ఈ వేడుక ఒక ఆధ్యాత్మికంగా సుసంపన్నమైన పండుగ వాతావరణాన్ని సృష్టించింది.
ఈ పవిత్ర వేడుకలో తెలుగు, తమిళ, కన్నడ, ఇంకా ఇతర భారతీయ రాష్ట్రాల భక్తులతో పాటు, అనేకమంది విదేశీ భక్తులు కూడా పాల్గొని ఆధ్యాత్మిక ఆనందాన్ని ఆస్వాదించారు. అనంతరం భక్తులకు టిటిడి లడ్డు ప్రసాదం, కళ్యాణ ప్రసాదం పంపిణీ చేశారు. ఈ కార్యక్రమ నిర్వాహకులు శ్రీక్రిష్ణ జవ్వాజి, సూర్య ప్రకాష్ వెలగా మాట్లాడుతూ, ఫ్రాంక్ఫార్ట్ లో నివసిస్తున్న తెలుగు ప్రజలకు ఈ కళ్యాణోత్సవం ద్వారా ఆధ్యాత్మిక అనుభూతి కలిగించగలగడం తమ భాగ్యమని చెప్పారు.
ఈ కార్యక్రమంలో సభ్యులు సుబ్బారావు కొర్లెపర, పూర్ణ కొర్లెపర, దిలీప్కుమార్, ప్రసాద్ నందమూరి తదితరులు పాల్గొన్నారు. మ్యూనిచ్, హోంబర్గ్ నగరాల నుంచి ప్రతినిధులు టిట్టు మద్దిపట్ల. డా.శివశంకర్ హాజరయ్యారు. యూరప్, యూకే కల్యాణం ప్రధాన కో ఆర్డినేటర్ డాక్టర్ కిశోర్ చలసాని సారథ్యంలో డాక్టర్ శ్రీకాంత్, సుమంత్ కొర్రపాటి తదితరులు ఈ కార్యక్రమాన్ని సమన్వయం చేయడంలో కీలకపాత్ర పోషించారు.
