వీజే సన్నీ, హ్రితిక జంటగా సంజయ్‌ శేరి దర్శకత్వంలో తెరకెక్కిస్తున్న చిత్రం సౌండ్ పార్టీ. ఫుల్‌మూన్‌ మీడియా ప్రొడక్షన్స్‌ పతాకంపై రవి పోలిశెట్టి, మహేంద్ర గజేంద్ర, శ్రీశ్యామ్‌ గజేంద్ర నిర్మిస్తున్నారు. ఈ చిత్రం లో శివన్నారాయణ, అలీ, సప్తగిరి, పృథ్వీ, మాణిక్‌ రెడ్డి, కాదంబరి కిరణ్‌ తదితరులు నటిస్తున్నారు. ఈ చిత్ర పోస్టర్‌ను ఎమ్మెల్సీ కల్వకుంట్ల కవిత ఆవిష్కరించారు. ఈ సందర్భంగా ఆమె మాట్లాడుతూ ఈ సినిమా టైటిల్‌ చాలా ఆసక్తికరంగా ఉంది. కాన్సెప్ట్‌ కూడా చాలా కొత్తగా ఉండబోతుందని టైటిల్‌ను చూస్తే అర్థమవుతున్నది. ఈ సినిమా పెద్ద విజయం సాధించి అందరికి మంచి గుర్తింపును తీసుకురావాలని కోరుకుంటున్నాఅన్నారు.
దర్శకుడు మాట్లాడుతూ టైటిల్‌కు అద్భుతమైన స్పందన లభిస్తున్నది. ఎమ్మెల్సీ కవితగారు పోస్టర్‌ను ఆవిష్కరించి మమ్మల్ని ఆశీర్వదించడం ఆనందంగా ఉంది. యూత్‌ఫుల్‌ ఎంటర్‌టైనర్‌గా ఈ సినిమా అందరిని అలరిస్తుంది అని చెప్పారు. ఫుల్‌ మీడియా ప్రొడక్షన్స్‌ సంస్థ రూపొందిస్తున్న తొలి చిత్రమిదని, వినూత్నమైన కథాంశంతో ఆకట్టుకుంటుందని నిర్మాత రవి పోలిశెట్టి తెలిపారు. యువతరంతో పాటు ఫ్యామిలీ ఆడియెన్స్‌ నచ్చే అంశాలన్నీ ఈ సినిమాలో ఉంటాయని హీరో వీజే సన్నీ పేర్కొన్నారు. చిత్రీకరణ పూర్తయింది. ప్రస్తుతం నిర్మాణానంతర కార్యక్రమాలు జరుగుతున్నాయి. ఈ చిత్రానికి కెమెరా: శ్రీనివాస్‌ రెడ్డి, సంగీతం: మోహిత్‌ రెహమానిక్‌, ప్రొడక్షన్‌ డిజైనర్‌: రాజీవ్‌ నాయర్‌, సమర్పణ: జయశంకర్‌, రచన-దర్శకత్వం: సంజయ్‌ శేరి.
