నాగచైతన్య కథానాయకుడిగా చందు మొండేటి దర్శకత్వంలో తెరకెక్కిస్తున్న చిత్రం తండేల్. అల్లు అరవింద్ సమర్పణలో గీతా ఆర్ట్స్ పతాకంపై బన్నీ వాసు నిర్మిస్తున్నారు. ముహూర్తపు సన్నివేశానికి హీరో వెంకటేష్ క్లాప్నివ్వగా, నాగార్జున కెమెరా స్విఛాన్ చేశారు. అల్లు అరవింద్ మాట్లాడుతూ ఈ కథను ఓ సరికొత్త ప్రపంచంలోకి తీసుకెళ్లి చూపించాలి. ఆ వరల్డ్ క్రియేట్ చేయడానికి చాలా జాగ్రత్తలు తీసుకున్నాం. ప్రీప్రొడక్షన్ సమయంలో ప్రతీ విషయాన్ని కూలంకషంగా చర్చించాం. ఇలాంటి సినిమా తీయాలి కదా అని మా అందరికి ఉత్సాహాన్నిచ్చింది ఈ కథ అని పేర్కొన్నారు.
దర్శకుడు మాట్లాడుతూ ఏడాదిన్నరకుపైగా ఈ కథపై వర్క్ చేశాం. యధార్థ సంఘటనల ఆధారంగా రూపొందిస్తున్నాం. ఎక్కువ భాగం ఒరిజినల్ లోకేషన్లలో షూటింగ్ జరుపుతాం అన్నారు. నిర్మాత బన్నీ వాసు మాట్లాడుతూ ఎంతో రీసెర్చ్ చేసి ఈ స్క్రిప్ట్ సిద్ధం చేశామని, ఈ సినిమా కోసం నాగచైతన్య తనని తాను అద్భుతంగా మలచుకున్నాడని, గీతా ఆర్ట్స్ సంస్థలో చాలా ప్రత్యేకత కలిగిన చిత్రమిదని తెలిపారు.
నాగచైతన్య మాట్లాడుతూ ఈ సినిమా కోసం శ్రీకాకుళం వెళ్లి మత్స్యకారులను కలిశాను. అక్కడి యాసపై కూడా వర్కవుట్ చేశా. ఏ సినిమాకు ఇంతటి ప్లానింగ్తో ముందుకెళ్లలేదు. నా కెరీర్లోనే ప్రత్యేకమైన సినిమా ఇది అన్నారు. ఈ చిత్రానికి కెమెరా: షామ్దత్, సంగీతం: దేవిశ్రీప్రసాద్, ఎడిటర్: నవీన్నూలి, ఆర్ట్: శ్రీనాగేంద్ర తంగాల, రచన-దర్శకత్వం: చందూ మొండేటి.
