ప్రియదర్శి కథానాయకుడిగా రూపొందిన చిత్రం డార్లింగ్‌. వైదిస్‌ కొలవెరి అనేది ఉపశీర్షిక. నభానటేష్‌ కథానాయిక. అశ్విన్‌రామ్‌ దర్శకుడు. కె.నిరంజన్‌రెడ్డి, చైతన్యరెడ్డి నిర్మాతలు. ఈనెల 19న సినిమా విడుదల కానుంది. ఈ సందర్భంగా ఏర్పాటు చేసిన ట్రైలర్‌ లాంచ్‌ కార్యక్రమంలో ప్రియదర్శి మాట్లాడారు. స్నేహితు లందరూ కలిసి పనిచేసిన సినిమా ఇది. డార్లింగ్‌ అనగానే అందరికీ గుర్తొచ్చేది ప్రభాస్‌ అన్న. ఈ సినిమాకు ఆ టైటిల్‌ ఖరారు చేయగానే భయమేసింది. అయితే కథకు ఆ టైటిల్‌ యాప్ట్‌. అందుకే పెట్టాం. నిర్మాతలు పాషన్‌ తో డబ్బుకు వెనుకాడకుండా సినిమాను నిర్మించారు. నా కోస్టార్‌ నభానటేష్‌ ఎక్స్‌ట్రార్డినరీగా నటించింది. వివేక్‌సాగర్‌ మ్యూజిక్‌ సూపర్‌. ఇలా అన్ని విధాలుగా ఈ సినిమా ఆకట్టుకుంటుంది అని అన్నారు.
ఈ కార్యక్రమానికి అతిథిగా విచ్చేసిన హీరో విశ్వక్‌సేన్‌ ట్రైలర్‌ని ఆవిష్కరించి, చిత్ర యూనిట్‌కు శుభాకాంక్షలు అందించారు. తాను యాక్సిడెంట్‌ నుంచి కోలుకున్న తర్వాత చేసిన సినిమా ఇదని, అద్భుతమైన కథ, ఆకట్టుకునే కేరక్టర్స్‌తో రూపొందిన ఈ సినిమా అందరికీ నచ్చుతుందని నభానటేష్‌ నమ్మకం వ్యక్తం చేసింది. సినిమా చాలా కొత్తగా, డిఫరెంట్‌గా ఉంటుందని, మంచి టీమ్‌తో కలిసి పనిచేయడం ఆనందంగా ఉందని దర్శకుడు చెప్పారు. ఇంకా నిర్మాత చైతన్యరెడ్డి కూడా మాట్లాడారు. చిత్రయూనిట్‌ మొత్తం ఈ కార్యక్రమంలో పాల్గొన్నారు.
