ప్రతిష్టాత్మక పుష్ప2-ది రూల్‌ సినిమా డిసెంబర్‌ 5న రిలీజ్‌ కానున్న విషయం విదితమే. ఈ చిత్రం ప్రమోషన్స్‌ లో మేకర్స్‌ వేగం పెంచారు. త్వరలోనే దేశంలోని ప్రధాన నగరాలైన పాట్నా, కలకత్తా, చెన్నై, కొచ్చి, బెంగళూ రు, ముంబయ్‌, హైదరాబాద్‌లలో ఈ సినిమా ప్రమోషన్స్‌ని నిర్వహించనున్నారు. ఇందులో భాగంగా పుష్ప 2- ది రూల్‌ చిత్రం ట్రైలర్ లాంచ్‌ని ఈ నెల 17న పాట్నాలో వైభవంగా నిర్వహించనున్నారు. దీనికి సంబంధించిన అనౌన్స్‌మెంట్‌ పోస్టర్‌ని మేకర్స్‌ విడుదల చేశారు.
గన్‌ భుజాన వేసుకొని మాసివ్‌ లుక్‌తో స్టైల్ గా నడిచి వస్తున్న బన్నీని ఈ పోస్టర్‌లో చూడొచ్చు. ఈ సినిమా చిత్రీకరణ చివరిదశలో ఉందనీ, నిర్మాణానంతర కార్యక్రమాలు కూడా జరుగుతున్నాయని మేకర్స్‌ తెలిపారు. రష్మిక మందన్నా కథానాయికగా నటిస్తున్న ఈ చిత్రంలో ఫహాద్‌ ఫాజిల్‌ కీలక పాత్ర పోషిస్తున్నారు. మైత్రీ మూవీమేకర్స్‌, సుకుమార్‌ రైటింగ్స్‌ కలిసి ఈ సినిమాను నిర్మిస్తున్న విషయం తెలిసిందే.
