ప్రపంచ కుబేరుడు ఎలాన్‌ మస్క్‌కు చెందిన ప్రముఖ ఎలక్ట్రిక్‌ కార్ల తయారీ సంస్థ టెస్లా కు చెందిన షోరూంపై మరోసారి కాల్పులు జరిగాయి. అమెరికాలోని ఒరెగాన్‌లో ఉన్న టెస్లా డీలర్‌షిప్‌పై గుర్తు తెలియని వ్యక్తులు కాల్పులకు తెగబడ్డారు. దుండగులు దాదాపు 12 సార్లు గన్‌ పేల్చి అలజడి సృష్టించారు. అయితే ఈ ఘటనలో ఎవరికీ గాయాలు కాలేదని స్థానిక పోలీసులు తెలిపారు. షోరూంలోని కొన్ని కార్లు, కిటికీలు ధ్వంసమయ్యాయని వెల్లడించారు. అయితే, టెస్లా షోరూంపై కాల్పులు జరగడం వారంలో ఇది రెండోసారి కావడం గమనార్హం. మార్చి 6వ తేదీన కూడా ఇదే షోరూంపై కాల్పులు జరిగాయి. ఈ దాడిలో పలు ఈవీ వాహనాలు ధ్వంసం అయ్యాయి.ట్రంప్ ప్రభుత్వంలో కీలక బాధ్యతలు చేపట్టిన టెస్లా బాస్‌ ఎలాన్‌ మస్క్‌ పై తీవ్ర వ్యతిరేకత వ్యక్తమవుతున్న విషయం తెలిసిందే.
