వెంకటేష్‌ హీరోగా నటిస్తున్న తాజా చిత్రం సంక్రాంతికి వస్తున్నాం. అనిల్‌ రావిపూడి దర్శకత్వం. ఈ చిత్రాన్ని శ్రీవెంకటేశ్వర క్రియేషన్స్‌ పతాకంపై దిల్‌రాజు సమర్పణలో శిరీష్‌ నిర్మిస్తున్నారు. సంక్రాంతి సందర్భంగా జనవరి 14న విడుదల కానుంది. బుధవారం నిర్వహించిన రిలీజ్‌ డేట్‌ అనౌన్స్‌మెంట్‌ సమావేశంలో వెంకటేష్‌ మాట్లాడుతూ టైటిల్‌లో చెప్పినట్లుగా నిజంగానే సంక్రాంతికి వస్తున్నాం (నవ్వుతూ). యూత్‌, ఫ్యామిలీస్‌ అందరికి ఈ సినిమా నచ్చుతుంది. నా కెరీర్‌లో బెస్ట్‌ ఫ్యామిలీ ఎంటర్‌టైనర్‌ ఇది. సంక్రాంతికి చక్కటి వినోదాన్ని పంచుతుంది అన్నారు.
ఈ సినిమా రషెష్‌ చూసి నాన్‌స్టాప్‌గా నవ్వుకున్నామని, సీతమ్మ వాకిట్లో సిరిమల్లె చెట్టు సినిమా నుంచి తమ సంస్థతో వెంకటేష్‌గారి అనుబంధం కొనసాగుతున్నదని, ఆ సినిమా తరహాలోనే పెద్ద విజయం సాధిస్తుందనే నమ్మకం ఉందని దిల్‌రాజు పేర్కొన్నారు. దర్శకుడు అనిల్‌ రావిపూడి మాట్లాడుతూ క్రైమ్‌ నేపథ్యంలో నడిచే ఫన్‌ ఎంటర్‌టైనర్‌ ఇది. ప్రేక్షకులు థ్రిల్‌కు గురవుతారు. వెంకటేష్‌గారితో హ్యాట్రిక్‌ హిట్‌గా నిలుస్తుందనే నమ్మకం ఉంది. కథానాయికలు ఐశ్వర్యరాజేష్‌, మీనాక్షి చౌదరి పాత్రలు గుర్తుండిపోతాయి అని చెప్పారు. పోలీస్‌ పాత్ర చేయాలని ఎప్పటి నుంచో అనుకుంటున్నానని, ఈ సినిమాతో ఆ కల తీరిందని మీనాక్షి చౌదరి పేర్కొంది. ఉపేంద్ర లిమాయే, రాజేంద్రప్రసాద్‌ తదితరులు నటిస్తున్నారు. ఈ చిత్రానికి కెమెరా: సమీర్‌ రెడ్డి, సంగీతం: భీమ్స్‌ సిసిరోలియో, రచన-దర్శకత్వం: అనిల్‌ రావిపూడి.
