చరిత్ర సృష్టించాలన్నా మేమే.. దాన్ని తిరగరాయాలన్నా మేమే అనే బాలయ్య డైలాగ్ చైనా దేశానికి సరిగ్గా సరిపోతుందని చెప్పుకోవచ్చు. ఎందుకంటే ఇప్పటివరకూ అది ప్రపంచంలో ఎవ్వరికీ సాధ్యం కాని ఎన్నో ఆవిష్కరణలను సృష్టించింది. అసాధ్యం అనుకున్న పనులను ఆ దేశం సుసాధ్యం చేసి చూపించింది. ఇప్పుడు తాజాగా మరో చారిత్రాత్మక ఫీట్ సాధించింది. అద్భుత టెక్నాలజీల ఆవిష్కరణలో శరవేగంగా దూసుకుపోతున్న చైనా, మరో మహాద్భుతాన్ని ఆవిష్కరించింది. ప్రపంచంలోనే అత్యంత వేగవంతమైన ఇంటర్నెట్ నెట్వర్క్ను విజయవంతంగా వినియోగంలోకి తెచ్చింది. ఇది ఎంత వేగవంతమైందంటే ఒక సెకనులో 150 సినిమాలను డౌన్లోడ్ చేయవచ్చు. సెకనులో 1.2 టెరాబైట్ (టీబీ) డాటాను ఈ నెట్వర్క్ ద్వారా విజయవంతంగా సరఫరా చేశారు. అంటే సెకనులో 1200 గిగాబైట్ (జీబీ) డాటా అన్నమాట. ప్రపంచంలో ప్రస్తుతం అందుబాటులో ఉన్న అత్యాధునిక ఇంటర్నెట్ టెక్నాలజీ అత్యధికంగా సెకనుకు 100 జీబీ డాటాను మాత్రమే మార్పిడి చేయగలదు.
ఇటీవల అమెరికా సెకనుకు 400 జీబీ డాటాను మార్పిడి చేయగల నెట్వర్క్ను నిర్మించింది. దీంతో పోల్చితే చైనా నెట్వర్క్ నాలుగింతలు. ఈ నెట్వర్క్ నిర్మాణం కోసం చైనా పదేండ్లుగా పరిశోధన చేస్తున్నది. ఈ ఆప్టికల్ ఫైబర్ కేబుల్ నెట్వర్క్ను బీజింగ్, వుహాన్, గాంగ్ఝౌ మధ్య 3000 కిలోమీటర్ల పొడవున ఏర్పాటుచేశారు. సింఝువా యూనివర్సిటీ, హువావే టెక్నాలజీస్, సెర్నెట్ కార్పొరేషన్ సంస్థలు కలిసి ఈ ప్రాజెక్ట్ని అభివృద్ధి చేశాయి.
