విశాల్ స్వీయ దర్శకత్వంలో నటించిన యాక్షన్ డ్రామా మకుటం. అంజలి, దుషార విజయన్ కథానాయికలు. స్వర్గీయ ఆర్బీ చౌదరి నిర్మాత. త్వరలో సినిమా విడుదల కానున్నది. ఈ సందర్భంగా నచ్చాకే వచ్చారా.. వెచ్చంగ హత్తుకో.. గుండెల్లో పెట్టుకో అంటూ సాగే ఈ సినిమాలోని రెండో పాటను మేకర్స్ హైదరాబాద్లోని నిర్వహించిన గ్రాండ్ ఈవెంట్లో విడుదల చేశారు. ఈ సందర్భంగా విశాల్ పై విధంగా స్పందించారు. శివ సినిమా చూశాక దర్శకుడిగా మారాలని ఫిక్స్ అయ్యాను. కానీ అనుకోకుండా హీరో అయ్యాను. దర్శకుడ్ని కావాలనుకున్న నా కల ఇన్నాళ్లకు మకుటం రూపంలో నిజమైంది. ఇది సూపర్గుడ్వారి 99వ సినిమా. ఈ సంస్థ నుంచి పరిచయమైన దర్శకుల్లో నేను 45వ వాడ్ని. ఆర్బీ చౌదరి ఈ బాధ్యతను నాకప్పగించారు. ఈ రోజు ఆయన్ను మిస్ అవుతున్నాం. ఈ సినిమా కోసం ఏడాదిపాటు వ్యక్తిగత విషయాలన్నింటినీ పక్కన పెట్టాను. నేను ఇప్పటివరకూ పనిచేసిన దర్శకుల అందరి టెక్నిక్స్ ఇందులో వాడాను. ఈ సినిమా కోసం నా బెస్ట్ ఇచ్చానని అనుకుంటున్నాను. సినిమా గురించి ఎక్కువగా చెప్పను. చూశాక ప్రేక్షకులే చెబుతారు అని అన్నారు.
ఇందులో ఓ మంచి పవర్ఫుల్ రోల్ పోషించానని, విశాల్ సినిమాను అద్భుతంగా తీశాడని, హీరోగా, దర్శకుడిగా తనకు పెద్ద విజయం దక్కుతుందని అంజలి నమ్మకంగా చెప్పింది. ఇంకా నటులు జితిన్ రమేశ్, అజయ్, నటి ఝాన్సీ, సింగర్ ప్రభ కూడా మాట్లాడారు.
