కార్తికేయ కథానాయకుడిగా రూపొందిన చిత్రం భజేవాయువేగం. ఐశ్వర్య మీనన్‌ కథానాయిక. ప్రశాంత్‌రెడ్డి దర్శకుడు. ప్రతిష్టాత్మక యూవీ క్రియేషన్స్‌ సమర్పణలో, యూవీ కాన్సెప్ట్స్‌ పతాకంపై తెరకెక్కిన ఈ చిత్రం సెన్సార్‌ యు/ఏ సర్టిఫికెట్‌ పొందినది. నేడు (శుక్రవారం) సినిమా విడుదల కానుంది. ఈ సందర్భంగా ఏర్పాటు చేసిన ప్రీరిలీజ్‌ ఈవెంట్‌కి అతిథిగా విచ్చేసిన శర్వానంద్‌ మాట్లాడుతూ కార్తికేయ ఆల్‌రౌండ్‌. యాక్షన్‌, ఎమోషన్‌, కామెడీ అన్ని జానర్స్‌ చేయగల నటుడు. తను తప్పకుండా సూపర్‌స్టార్‌ అవుతాడు అని హీరో శర్వా నంద్‌ నమ్మకం వెలిబుచ్చారు. ఈ టీమ్‌లో చాలామందితో పనిచేశాను. దర్శకుడు ప్రశాంతే ఈ సినిమాకు నిజమైన హీరో. తనెప్పుడు మాస్‌ మాస్‌ అని కలవరిస్తాడు. ఆ తరహా కథలే రాస్తాడు. తను రన్‌ రాజా రన్‌ డైరెక్షన్‌ డిపార్ట్‌మెంట్‌లో పనిచేశాడు. అప్పుడే అనుకున్నా ఇతను పెద్ద డైరెక్టర్‌ అవుతాడని. కచ్చితంగా అందరూ మెచ్చే సినిమాగా ఈ భజే వాయువేగం నిలుస్తుంది అని శర్వానంద్‌ నమ్మకంగా చెప్పారు.
ఎలాంటి కథకోసం ఇన్నాళ్లూ ఎదురు చూశానో, అలాంటి కథే భజేవాయువేగం. ముందు దర్శకుడు ప్రశాంత్‌రెడ్డికి థ్యాంక్స్‌. ఆర్‌ఎక్స్‌ 100 తర్వాత ఆ స్థాయి విజయం రాలేదు. ఆ లోటు ఈ సినిమా తీర్చేస్తుంది అని కార్తికేయ అన్నారు. అన్నీ కుదిరిన సినిమా భజేవాయువేగం అని చెబుతూ.. సహకరించిన అందరికీ దర్శకుడు ప్రశాంత్‌రెడ్డి కృతజ్ఞతలు తెలిపారు. అతిథులుగా విచ్చేసిన మేర్లపాక గాంధీ, వశిష్ఠ చిత్రబృందానికి శుభాకాంక్షలు అందించారు. ఇంకా చిత్రయూనిట్‌ సభ్యులంతా మాట్లాడారు.
